Matie wat sterf ‘het diep spore getrap’

Leandró Hopley. (Foto: Verskaf)

“Hy was ʼn go-getter met ʼn sagte en liefdevolle hart. Hy het altyd vir almal omgegee en sy trane het maklik geloop vir ander se pyn. Waar hy geloop het, het hy diep spore getrap.”

Só onthou Charl Hopley sy jongste seun, Leandró (18), wat gister dood is nadat hy in sy koshuiskamer op die kampus van die Universiteit Stellenbosch verstik het.

Charl, sy vrou, Suzette, en hul oudste seun, John, is nog in skok oor die skielike dood van hul “engelkind en klein boetie”. Woensdag was Leandró nog ʼn blakend gesonde, lewenslustige eerstejaar in BCom Bestuurswetenskappe. Donderdagoggend is hy vanaf Huis Visser na ʼn hospitaal gehaas.

“Hulle het Donderdagoggend 01:36 gebel en gesê Leandró is in die hospitaal opgeneem. Ons vermoed hulle het gekuier by die koshuis,” sê Charl.

“Een van die HK-lede het ʼn draai by hom gaan maak die aand en gesien dat hy blou is om sy lippe. Hy het onmiddellik alarm gemaak en die inwonende hoof het dadelik die nooddienste gebel. CPR is op hom toegepas, voordat hy na ʼn hospitaal op Stellenbosch geneem is. Nadat hy gestabiliseer was, het hulle ons gekontak. Toe ons by die hospitaal aankom, het ons verneem dat hy aan sy eie braaksel verstik het.”

Die Hopley-gesin. Leandró, ma Suzette, pa Charl en ouboet John. (Foto: Verskaf)

Martin Viljoen, woordvoerder van die US, het vroeër aan Maroela Media gesê dat Leandró se lewensondersteunende toerusting Vrydag afgeskakel is. Volgens hom is die presiese omstandighede wat tot Hopley se mediese krisis gelei het onduidelik.

Huldeblyke vir Leandró is sedert gister op die US se Facebook-blad en dié van Hugenote Hoërskool Wellington, waar hy ʼn leerder was, gedeel.

Geen begrafnisreëlings is nog getref nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Anka le Roux

Aan die Hopley gesin, ek is jammer oor jul groot verlies. Ek dink aan julle.

Ore

Maak nie saak wat die oorsaak is nie,dit bly hartseer.Sterkte aan die familie

Bossie

Charl, Suzette, John en familie, ek bid vir jul baie sterkte en seën toe. Mag julle vertroosting vind aan God se voete. Ek wens altyd iemand kan net die seer wegvat maar dit is nie moontlik nie. Waarom moes dit juis met Leandró gebeur? Niemand sal ooit weet nie. Moet dit nooit vra nie want daardie vraag maak mens siek. Hierdie was net ‘n fratsongeluk in my oë. Toe my pa dood is aan longkanker het iemand vir my gesê eendag is die kring voltooi. Dit het effens vrede in my hart gebring. RIV Leandró. Ons is saam hartseer…

Onnie

Die Hopleys was van vredenburg. Leandro was op Wellington in Hugenote. Sterkte aan die familie in die onsettend hartseer tyd

Lindie

So verskriklik jammer vir Die familie!