Miljoene in die water ná skool op vleiland gebou word

Argieffoto van skoolgronde ter illustrasie. (Foto: Unsplash)

Miljoene rande is letterlik in die water gegooi nadat ’n skool op ’n vleiland in die omgewing van Tembisa tussen Pretoria en Johannesburg gebou is.

Die Mayibuye Primary School was veronderstel om al teen 2017 leerders te akkommodeer, maar staan in dié stadium steeds leeg nadat die Gautengse departement van infrastruktuurontwikkeling en eiendomsbestuur nie die nodige sertifikate kon bekom nie weens die gevaarlike terrein waarop die skool gebou is.

Dié departement het tot op hede sowat R82 miljoen aan die skool bestee, hoewel die skool se gekraakte mure, lang gras en probleme met riool nie hiervan getuig nie, meen Mpho Modise, voorsitter van die Gautengse wetgewer se komitee vir infrastruktuurontwikkeling.

Modise het Maandag gesê dié komitee oorweeg dit nou om strafregtelike aanklagte teen amptenare van die departement en die kontrakteur wat die skool gebou het, aanhangig te maak.

Volgens Modise het die komitee die betrokke skool verlede maand besoek om die standaard en gehalte van die kontrakteur se werk na te gaan. Die komitee het sedertdien vasgestel dat die skool strydig met die Wet op Nasionale Bouregulasies en Boustandaarde gebou is.

“Die komitee het in sy beoordeling van die skool tot die gevolgtrekking gekom dat die skool ’n gevaar vir leerders en onderwysers inhou aangesien die vleiland moontlik die struktuur kan verswak wat beteken dat die gebou ineen kan stort.”

Die komitee sal nou in samewerking met die portefeuljekomitee vir onderwys ’n brief aan David Makhura, premier van Gauteng, rig word om te versoek dat hy ’n ondersoek van stapel stuur wat sal lei tot tugstappe teen amptenare wat toesig oor die konstruksie gehou het.

Volgens Modise het die regering nou twee opsies: Om miljoene rande aan die skool te bestee of dit eenvoudig te sloop om te verhoed dat dit later deur misdadigers of onwettige besetters beset word.

“Die komitee is van mening dat daar opgetree behoort te word teen diegene wat betrokke was by die vermorsing [van geld] deur ’n skool op ’n vleiland te bou. Dit sal ’n verkeerde boodskap oor die gebrek aan aanspreeklikheid en bestuur van gevolge in die provinsie stuur indien stappe nie gedoen word nie.”