Molewa stuur bemiddelaar na Kanada vir SA-brandbestryders

Die Working on Fire-span wat op 29 Mei 2016 na Kanada vertrek het om dié land te help om hewige veldbrande in Alberta te blus Foto: Working on Fire, Facebook

Die Working on Fire-span wat op 29 Mei 2016 na Kanada vertrek het om dié land te help om hewige veldbrande in Alberta te blus Foto: Working on Fire, Facebook

Die minister van omgewingsake het ʼn bemiddelaar van Working on Fire na Kanada gestuur om die dispuut op te los tussen die maatskappy se bestuur en 301 Suid-Afrikaanse brandbestryders wat ontplooi is vir hulp met veldbrande in Alberta.

Minister Edna Molewa stuur Trevor Abrahams van Working on Fire (WoF) en ʼn hoëvlakbestuurspan van WoF saam met Membathisi Mdladlana, die Suid-Afrikaanse hoë kommissaris vir Kanada, om met die stakende brandbestryders te vergader en hul besware aan te spreek.

Maroela Media het vroeër berig pres. Jacob Zuma het Saterdag Molewa versoek om in te gryp om die saak op te los.

“Die minister is vol vertroue dat die saak op ʼn wyse opgelos kan word waar alle partye tevrede sal wees, waarna die brandbestryders gedemobiliseer kan word en veilig kan terugkeer na Suid-Afrika,” het Molewa se kantoor Sondag in ʼn verklaring gesê. “Indien ʼn oplossing nie gevind word nie, sal die bemiddelingspan seker maak dat die brandbestryders gedemobiliseer word en veilig na Suid-Afrika terugkeer.”

Molewa stem glo ten volle saam met die goewerneur van Alberta, Rachel Notley, dat vergoeding vir die brandbestryders regverdig en billik moet wees (meer inligting hier oor Notley se uitsprake).

Die departement sal gevolglik direk met WoF-personeel en die Kanadese regering vergader oor die voorwaardes waarop die Suid-Afrikaanse brandbestryders nou en in die toekoms ontplooi word.

Dit sluit glo ʼn memorandum van verstandhouding tussen die regerings van Suid-Afrika en Kanada in, asook ʼn gepaardgaande implementeringsplan tussen die agentskappe in Kanada en Suid-Afrika. Dié plan sal in konsultasie met WoF-brandbestryders saamgestel word.

Die 301 brandbestryders het op 29 Mei 2016 na Kanada vertrek om te help om veldbrande in Alberta te bestry.

“Working on Fire bestaan al sedert 2003 en het internasionale erkenning ontvang vir sy rol in die bewaring van die omgewing, bydrae tot die volhoubaarheid van ekostelsels en opheffing van gemeenskappe deur werksgeleenthede en vaardigheidsopwikkeling van deelnemers,” het die ministerie bygevoeg.

Jong mans en vroue van benadeelde gemeenskappe word opgelei in brandbestryding en -voorkoming asook noodhulp, houtwerk, kookkuns, gesondheid en veiligheid, spanwerk, leierskapsvaardighede en kommunikasie.

“Working on Fire is deel van die regering se uitgebreide openbarewerkeprogram wat ten doel het om werksgeleenthede te skep vir Suid-Afrikaners wat nie werk kan kry nie, en hulle met die nodige vaardighede toe te rus en hul kapasiteit te verhoog om ʼn inkomste te verseker en die formele werksplek te betree,” het die ministerie verduidelik. “Twee jong voormalige brandbestryders van Working on Fire het verlede jaar met ʼn vlieëniersopleidingsprogram by WoF se implementeringsagentskap begin en hulle sal na verwagting een dag WoF se brandbestrydingsvliegtuie vlieg.

“Ons is geweldig trots op ons goed opgeleide brandbestryders wat oor ʼn aantal jaar uitstekende werk gedoen het en deur die internasionale brandbestrydingsgemeenskap erken word.”

Lees alle vorige berigte oor Working on Fire/Kanada op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
D

Ons trots. Ons voer nou al stakings uit.

Grap

Skandalig ,Skandalig kan niks meer sê nie.

Mixi

Hehehe. Ek kan julle belowe dié was n “fatale strike” gewees en n hengse klap in die gesig vir die buite land. Hier is wat die buitelandse anti-apartheid krete hulleself ook nou begin oor die vingers tik.

Gys

En daar slaan Suid-Afrika, ons vrye demokratiese land, met sy mense regte, ons naam weer met ‘n plank.

Slegs God weet waarnatoe ons beweeg.

Jan maak n plan

Wat n skande. Is hulle dan nie al terug gestuur SA toe nie. As ek die Kanadese regering is dan betaal ek hulle nie n sent nie.