Moordklag teen oupa wat inbreker doodskiet

Giel Fourie. Foto: Verskaf

“Ek sou nie die ou doodgeskiet het as hy net geluister en sy goed neergesit het nie.”

Só sê ʼn 65-jarige man van Grabouw in die Suidwes-Kaap wat tereg staan vir die moord op ʼn vermeende inbreker wat hom na bewering in sy huis met ʼn mes aangeval het.

Giel Fourie vertel dit was nie die eerste keer dat die man op hom en sy vrou, Susan, toegeslaan het nie. Op 11 Desember verlede jaar het hy Susan glo van R1 500 beroof wat sy ingevorder het nadat sy die pasteie op die dorp afgelewer het wat die egpaar tuis bak om hul inkomste mee aan te vul.

“Ons is 100% seker dis dieselfde man,” het Giel Dinsdag aan Maroela Media gesê. “Hy het destyds oor die veiligheidshek by die agterdeur geklim en my vrou oorval terwyl sy skottelgoed gewas het. Nadat hy haar vasgebind en met ʼn mes gedreig het, het hy met die geld weggekom.”

In die jongste voorval, verlede Donderdag, het die Fouries se kleindogter omstreeks 10:30 by hulle kom kuier. Nadat Giel en Susan se afleweringswerk vir die oggend klaar was, het sy besluit om huis skoon te maak.

Sy was besig in hul dogter se kamer en het die bank weggeskuif, toe sy op dieselfde man van Desember afkom, vertel Giel, met twee messe by hom. “Sy het vir my geskree om te kom help. Die man het probeer weghol, maar kon nie oor die veiligheidshek kom nie.”

Giel is na sy kluis om sy vuurwapen te kry terwyl sy vrou en kleindogter “histeries” was. “Ek het gedink: ‘Ek het ʼn rewolwer. Ek kan nie toelaat dat die ou ons seermaak nie.”

Ek wou hom net daar hou tot die polisie hom in hegtenis kon kom neem.

Hy het die vermeende aanvaller “seker vier keer” gewaarsku hy gaan hom skiet. “Ek wou hom net daar hou tot die polisie hom in hegtenis kon kom neem.”

Giel vertel hy laai altyd sy rewolwer dat die eerste patroon donshael is wat as waarskuwingskoot kan dien. Maar die man het hom min aan Giel se waarskuwings gesteur. “Ek het gesê: ‘Gooi neer jou mes en gaan lê op die grond,’ maar hy het net bly aankom.”

Toe hy besef die afstand tussen hom en die vermeende aanvaller raak te klein, het hy die eerste patroon met die donshael afgevuur, maar die man, wie se oë Giel vertel stokstyf was, het net bly nader kom. “Hy het nie eens ʼn oog geknip toe ek die eerste skoot skiet nie. Toe steek hy my in die arm.”

Die tweede skoot het die man in die bors getref, sê Giel. “Die derde skoot wat ek geskiet het, was net van bangheid. Toe val hy neer.”

Die Fouries vermoed die man het hulle ingewag met die idee om weer geld by hulle te kry soos in Desember. “Hy het reeds ʼn kombers oor die veiligheidshek gegooi om weer daarlangs weg te kom.

“Veiligheidshekke beteken niks. Ons hou alles gesluit, maar het nooit gedink hy sou bo-oor klim nie.”

As iemand my familie leed wil aandoen, sal ek skiet.

Giel vertel hy wou nie skiet nie, “maar ek sal nie toelaat dat iemand my vrou en kleinkind skade berokken nie. Ek is ʼn baie saggeaarde mens, maar as iemand my familie leed wil aandoen, sal ek skiet.”

Hy het Vrydag in die plaaslike landdroshof voorgekom op ʼn aanklag van moord en is op borgtog van R500 vrygelaat.

“Die bystand van die gemeenskap is ongelooflik,” vertel Giel. “Almal sê net ek moenie worry nie. ʼn Prokureur van die Strand het intussen gebel en haar dienste gratis aangebied.”

Giel moet op 6 Mei weer in die hof verskyn, maar sê hy glo vas alles sal goed afloop.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

80 Kommentare

jongste oudste gewildste
Johan

Dit sal ook net in Suid-Afrika wees waar die slagoffer aangekla word. Ongelooflik. Ons lewe in ‘n kleptomaniese samelewing waar die oortreders soms meer regte het as die slagoffers!

kolla

Dink nie dit was nodig om die ou dood te skiet nie. Lyk asof hy heelwat tyd gehad het om skote af te vuur. Hy kon die ou in die bene geskiet het. Gaan ‘n interessante een wees.

Cecilia Steyn

Só tipies van hierdie stupid land! Boewe het mos régte, maar wetsgehoorsame burgers moet die spit afbyt!

Veronica

Ja Kolla. Sal graag wil sien wat jy sal doen as n booswig met n mes op jóu afstorm! 0nthou: die oom is in die arm gesteek!! Sterkte vir die oom en familie!

Pierre

Kolla, Op daai oomblik dink jy nie aan om ‘n persoon in die bene te skiet nie, jy skiet om hom te stop, hy het geen reg om jou lewe te bedreig nie.