MRK-hoof in die sop oor Etzebeth

Eben Etzebeth het die span in Siya Kolisi se afwesigheid gelei. Foto: GB Jordaan.

Buang Jones, hoof van regsdienste by die Suid-Afrikaanse Menseregtekommissie (MRK), is in die pekel weens sy gedrag in sy ondersoek na beweerde rassisme deur die Springbokslot Eben Etzebeth.

Adv. Bongani Majola, voorsitter van die MRK, het vanmiddag in die parlement aangekondig dat hy opdrag gegee het dat daar dringend ondersoek ingestel word na Jones se gedrag, en na sy geskiktheid om die Etzebeth-saak verder te ondersoek.

Majola het die besluit self aan Jones oorgedra, en Jones is verbied om enige verdere openbare stellings oor die Etzebeth-kwessie te maak.

Die saak spruit uit ʼn beweerde voorval in Langebaan aan die Weskus waar Etzebeth en/of vriende van hom na bewering rassisties opgetree het. Etzebeth, wat tans in Japan aan die Wêreldbeker-rugbytoernooi deelneem, ontken die bewerings ten sterkste. Jones het egter volgens mediaberigte reeds in die openbaar gesê Etzebeth “het met moord weggekom” en dat die MRK “van hom ʼn voorbeeld gaan maak”.

Jones se stellings is vanmiddag in ʼn gespanne vergadering van die parlementêre portefeuljekomitee oor justisie deur sowel die DA as die VF Plus van rassistiese vooroordeel teen wit Suid-Afrikaners beskuldig.

Zindzi Mandela (Foto: Twitter)

Werner Horn, DA-LP, het gesê die MRK het dubbele standaarde wanneer hulle bitterlik stadig indien hoegenaamd optree teen mense soos Zindzi Mandela, voormalige Suid-Afrikaanse ambassadeur in Denemarke, Andile Mngxitama van Black First Land First of die EFF-leier, Julius Malema. Dit teenoor die haas waarmee Jones vir Etzebeth in die openbaar skuldig bevind sonder verhoor of sonder dat sy kant aangehoor is. Dit laat die persepsie ontstaan dat die MRK bevooroordeeld is teen wit mense.

Ook dr. Corné Mulder, VF Plus-hoofsweep, het ʼn onderskeid getref tussen die manier waarop klagtes wat die VF Plus, asook sommige wit mense wat volgens hom duidelik die slagoffers van rassisme was, by die MRK aanhangig gemaak het. Hierdie sake is oor baie jare en baie slap hanteer, teenoor hoe Etzebeth nou sommer vooraf in die openbaar skuldig bevind word, het hy gesê.

Die MRK het die bewerings van anti-wit gedrag ontken en gesê elke keer dat ʼn prominente wit persoon se gedrag deur die MRK ondersoek word, kom sulke bewerings voor. “Wanneer ʼn prominente swart persoon ondersoek word, word weer beweer die MRK is agente van wit monopolie-kapitaal.”

Priscilla Jana, menseregtekommissaris en voormalige ANC-LP, het aangevoer “Zindzi” (Mandela), na wie sy deurgaans op die voornaam verwys het, se gedrag verskil per definisie van Etzebeth s’n omdat hul geleefde wêrelde verskil.

Adv. Andre Gaum, nog ʼn menseregtekommissaris en ook ʼn voormalige ANC- en NNP-LP, het egter gesê Mandela se saak word nog ondersoek. Die MRK het trouens later aangedui dat Mandela se saak deur die MRK voor die hof gedaag is en dat Mandela nou ʼn senior advokaat aangestel het om haar te verdedig.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

67 Kommentare

jongste oudste gewildste
Wielspore

Ja mnr Jones, dit gebeur as jou persoonlike oortuigings en siening juis ander mense jou besluitneming by die werk negatief beinvloed, jy slaan jou naam met ‘n plank. Omdat jy ‘n openbare figuur is het hierdie plank momentum bygekry en jy word in die openbaar onbevoeg verklaar om voort te gaan met jou ondersoek.

Koos de Meyer.

Maak ‘n voorbeeld van mnr Jones.

Anoniem

Geen genade, wys sy swakplekke !

Zachrys

Ek dink Jones is skuldig! ????

Anni

Daar mut ook net onthou word dat hierdie Jones gesě het, Eben mut van moord aan gekla word. Siestog shame hy het seker helse grade agter Sy naam om so iets slim te kan kwyt raak.