Die gebande muishonde het Roux se voortuin verken (Foto: Owl Rescue Centre, Facebook)
ʼn Man van Pretoria kon sy oë nie glo nie toe hy ná ʼn besoek aan ʼn wildreservaat by sy huis stilhou en daar meer as 30 gebande muishonde uit die voertuig se onderstel gepeul het.
André Roux het Saterdag vroegoggend van die Mabula-wildreservaat naby Bela-Bela in Limpopo na sy huis in Silver Lakes in Pretoria teruggekeer. Die muishonde moes deur die nag in sy BMW X5 se onderstel geklim het en het al die pad saam stad toe gery.
Roux het die Owl Rescue Centre, ʼn bewaringsorganisasie in Hartbeespoort, genader om die muishonde te vang en op ʼn veilige plek weer vry te laat.
“Dit is ongelooflik om te dink dat die muishonde vir ongeveer 170 km saamgery het, sonder dat Roux dit agtergekom het,” sê Brendan Murray, verbonde aan die organisasie.
“Nie een van die diertjies het seergekry of selfs brandplekke opgedoen nie.”
Murray sê hulle het Saterdag 30 van die vermoedelik 31 muishonde gevang en na die wildreservaat teruggeneem.
30 van die 31 muishonde is reeds gevang (Foto: Owl Rescue Centre, Facebook)
Daar is minstens nog een wat hulle nie in die hande kon kry nie, maar daar is vanghokke in die woonbuurt neergesit om die dier te probeer vang.
“Een van die inwoners het gisteroggend die muishond in een van die huise se erwe gesien. So, ons hoop dat ons hom sommer gou sal vang sodat hy by sy maats kan aansluit.”
Volgens Murray gebeur dit gereeld by reservate dat gebande muishonde in voertuie se onderstelle klim om daar te slaap. By sommige reservate is daar selfs bewaarders wat moet help keer dat die muishonde teen sonsondergang naby voertuie kom.
“Muishonde slaap graag op verskillende plekke en is boonop nuuskierige diertjies. Hulle gaan slaap wanneer dit donker word en word weer wakker sodra die son opkom. Hulle moes Vrydagaand in Roux se voertuig se onderstel ingeklim en daar geslaap het.
“Omdat Roux voor sonsopkoms in die pad geval het, het die muishonde nog geslaap. Hulle enigste uitkomkans was toe Roux by die huis stilgehou het.”
Beteken gebande gestreepte?, moet erken die woord gebande is totaal en al onbekend aan my.
Baie bly die diertjies is ongedeerd
die “band” is strepe wat reg rondom die diertjie voorkom
“https://af.wikipedia.org/wiki/Gebande_muishond”
Gebande muishond = banded mongoose.
Goeie storie. Almal het die regte ding gedoen en die oulike diere terug besorg waar hulle hoort! Pluimpie vir ieder en elk.
my vermoede daar sou meer gewees het, wat is kanse dat van die ander dalk afgeval het in die ryery, niemand sal dit dalk weet nie
Te mooi.
Ag ek is Goddank bly dat hulle niks oorgekom het nie. ‘n Paar is een ding, maar 31 en nie een het seergekry nie. Dis ‘n wonderwerk.
Dis wat ek noem n close familie
Wat ‘n besondere verhaal.
Dit is lekker om sulke nuus te lees ! Mens raak so moeg vir al die negatiewe dinge wat ons elke dag van hoor , sien en lees.
Gebande muishond = banded mongoose.