Ontploffing: Liggaam onder motor in Jhb gekry

Die ontploffing het Woensdag (19 Julie 2023) die middestad van Johannesburg geruk. (Foto: SAgovnews/Twitter)

Panyaza Lesufi, premier van Gauteng, sê die liggaam van ʼn man is in die vroeë oggendure in Breestraat aangetref nadat ʼn ondergrondse ontploffing die vorige dag dié deel van Johannesburg geruk het.

Volgens Lesufi is die slagoffer se liggaam op die hoek van Bree- en Joubertstraat gevind.

“Terwyl wetstoepassingsowerhede besig was om die voertuie in die gebied te verwyder, het hulle die liggaam van ʼn man onder een van die motors aangetref,” sê hy.

“Die oorledene is nog nie geïdentifiseer nie en die polisie probeer sy naasbestaandes opspoor.”

Teen Donderdagoggend het die getal beseerdes weens die ontploffing op 48 gestaan.

“In hierdie stadium is daar nog 12 pasiënte in die hospitaal; die res is reeds ontslaan.”

Chaos in middestad

(Foto: @SaxXaba/Twitter)

Chaos het Donderdagoggend in die middestad geheers nadat verskeie strate afgesper is. Honderde motoriste en pendelaars moes van alternatiewe paaie gebruik maak om by die werk te kom en dit het tot groot vertragings en verkeersopeenhopings gelei.

“Die padsluitings is ʼn groot hoofpyn omdat Breestraat een van die besigste strate in die middestad is,” sê Lesufi.

Ondanks die chaos is die middestad wel vir die publiek toeganklik.

“Die metropolisie en die polisie bestuur die padsluitings en beveilig die toneel,” sê hy.

Nog wetstoepassers sal na verwagting deur die loop van die dag na die toneel gestuur word.

Please avoid Lilian Ngoyi (Bree) Street in JHB CBD between Eloff and Harrison streets. The road is closed following yesterday's explosion and road collapse.

Alternative routes:
– From eastbound travel along Lilian Ngoyi, turn right into Simmonds and then left into either… pic.twitter.com/Xb4Wz0yN4v

— City of Joburg (@CityofJoburgZA) July 20, 2023

Mense was Woensdag stomgeslaan toe ʼn ontploffing die oppervlak van Breestraat oopgekloof het.

Daar is aanvanklik vermoed dat die skade weens ʼn ontploffing van ʼn ondergrondse gaspypleiding veroorsaak is. Die gasmaatskappy Egoli Gas het egter reeds gesê dat sy pyplyne nie enige skade opgedoen het nie, behalwe vir ʼn lekkasie wat aan een van sy laedruk-pyplyne opgemerk is.

Lesufi sê daar is kenners op die toneel om te help bepaal of die ontploffing wel aan gas toegeskryf kan word, aangesien daar steeds ʼn gasreuk in die lug hang.

“Al die maatskappye wat gaspyplyne in die stad het, soos Egoli Gas en Sasol, is op die toneel, asook enigiemand anders wat ʼn ondergrondse pypleiding of kabels het, soos Telkom en City Power,” sê hy.

“Hierdie spanne gaan ons help bepaal wat tot die ontploffing aanleiding gegee het, en wat die pad vorentoe is.”

City Power het reeds drie van sy substasies afgeskakel sodat sy infrastruktuur vir enige skade ondersoek kan word. Inwoners wat deur die Bree-, Braamfontein- en Johnware-substasie bedien word se kragtoevoer sal tot verdere kennisgewing onderbreek word.

Lesufi sê die spanne wat verantwoordelik is om die oorsaak van die ontploffing te bepaal het as deel van hulle krisisbestuurbeplanning gesê dat dit moontlik is dat ʼn tweede ontploffing in die gebied kan plaasvind.

“Ons sê nie dit gaan gebeur nie, maar dit is beslis moontlik.

“Intussen doen die spanne alles moontlik – soos om paaie te sluit – om enige lewensverlies te voorkom indien daar nog ʼn ontploffing is.”