ʼn Paartjie is Woensdagoggend dood in hul woonstel aangetref nadat hulle aan giftige gasse blootgestel is. Dié walms was glo van ʼn naburige woonstel afkomstig.
ʼn Familielid van die paartjie het die oggend na hul woonstel gegaan nadat hulle nie op oproepe gereageer het nie.
“Die familielid het die man en vrou in die woonstel aangetref. Hulle het leweloos voorgekom,” sê Shawn Herbst, woordvoerder van Netcare 911.
Paramedici is kort ná 10:00 na die woonstel in Currieweg in Musgrave, Durban, ontbied en het enkele minute later by die toneel opgedaag.
Die eThekwini- plaaslike munisipaliteit se brandweer- en reddingsdiens, asook die polisie se springstof-eenheid was op die toneel.
“Dit het aan die lig gekom dat die aangrensende woonstel, wat leeg staan, vroeër berook is. Die middels het ʼn giftige wit poeierneerslag gehad,” sê Herbst.
Die brandweer moes eers ʼn industriële waaier gebruik om die giftige stof uit die woonstel te kry voordat paramedici die toneel kon betree.
Paramedici en lede van die brandweer moes asemhalingsapparaat gebruik om die eenheid binne te gaan.
“Hulle het ʼn volwasse man en ʼn volwasse vrou in hul bed aangetref en gehaas om hulle te help. Die paartjie het egter leweloos voorgekom en is op die toneel dood verklaar.”
Die omstandighede van die paartjie se skielike dood word nou deur die polisie ondersoek.
Dit is nog nie duidelik of die familie van die oorledenes in hul persoonlike hoedanigheid verdere stappe gaan doen nie.
Nou hoe kom n aangrensende woonstel se gif in hulle woonstel in?
Ek weet nie!
Die vensters en deure was seker nie dig nie. Sommige van die ou geboue se instandhouding iks maar power, om die minste te sê, plekke word uitverhuur, maar jy sien nie ‘n eienaar naby die plek wat jy huur nie. Hulle wil net die huur ontvanng, en dit is dit.
Miskien deur die plafon.
Dit is vreeslik hartseer dat 2 jongmense op dié manier aan hul dood kom. Innige meegevoel met die familie
Dit is uiters onverantwoordelik om giftige gas vry te laat waar daar mense in die nabyheid is! Is dit nie teen die wet nie? Die naasbestaandes het duidelik ‘n sterk saak om die skuldiges verantwoordelik te hou.