Die polisie se nasionale eenheid vir vervalste goedere het Vrydag op die Johannesburgse middestad toegesak en beslag gelê op nagemaakte goedere van R9 miljoen.
Die eenheid, wat onder andere uit lede van die polisie, die Suid-Afrikaanse Inkomstediens, verkeerspolisiebeamptes, handelsmerkbewaarders en veiligheidsmaatskappye bestaan, het meer as 11 000 items gegryp wat alles onder bekende handelsname verkoop word.
Dit sluit in klere, sonbrille, skoene, pette, handsakke en horlosies.
Lt.kol. Amanda van Wyk, polisiewoordvoerder, sê dit was die derde groot klopjag die afgelope vier weke in Gauteng.
Nagemaakte items ter waarde van miljoene rande is verlede week ook tydens ’n klopjag in Rustenburg in Noordwes gevind. Tydens dié operasie het die polisie beslag gelê op nagemaakte goedere van R8 miljoen.
Volgens Van Wyk bring dit die waarde van die aantal nagemaakte items wat oor die afgelope vier weke deur die polisie gegryp is, op R30 miljoen te staan.
“Die polisie is vasbeslote om die handel in nagemaakte goedere te stuit, aangesien dit ’n uiters nadelige uitwerking op ekonomiese groei in die land het.”
Die volgende groot besending is alreeds weer op pad so hierdie is tyd mors.
Wat word van al die goed waarop hulle beslag le? Hoeveel gaan in hulle eie sakke in?
Hoop die vervalste goedere word aan weeshuise en minder bevoorregte mense geskenk.