Polisieman in oprit doodgeskiet

Argieffoto

ʼn Polisiekolonel van Witbank in Mpumalanga is Dinsdagaand in die oprit voor sy huis koelbloedig doodgeskiet.

Lt.kol. Fana Simon Maseko het net voor sy huis in Mtsukistraat in Ackerville stilgehou, toe twee gewapende mans op hom losgebrand het. Hy het op die toneel gesterf.

Brig. Vishnu Naidoo, nasionale polisiewoordvoerder, sê die skieters het met leë hande van die toneel gevlug. Die motief vir die moord op Maseko is nie tans bekend nie.

Genl. Khehla John Sitole, nasionale kommissaris van die polisie, het opdrag gegee dat ʼn 72-uur-aksieplan in werking gestel word om die moordenaars so vinnig moontlik vas te trek. Volgens Naidoo is lede van die polisie se misdaadintelligensie-eenheid, forensiese kenners, en speurders van die polisie en die Valke tans besig om elke moontlike leidraad op te volg om die skuldiges op te spoor.

“Ek het die provinsiale span opdrag gegee om geen hulpbronne te ontsien nie om die mense wat hiervoor verantwoordelik was op te spoor,” het Sitole gesê. “’n Aanval op ʼn polisiebeampte is ʼn aanval op die nasie en as nasie moet ons saamstaan om hierdie voortgesette aanvalle op ons mans en vroue in blou onmiddellik stop te sit.”

Sitole het ʼn beroep gedoen op enigiemand met meer inligting oor die skietvoorval om dit by Stop Misdaad by 0860 010 111 aan te meld.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Elize

Lees ek reg. Die moor van manne en vroue in blou moet onmiddelik stop gesit word en alle hulpbronne sal ingespan word om moordenaars op te spoor. Wat van manne en vroue wat nie in blou geklee is nie Sithole. Wat doen jy daaraan. Verseker stel jy nie alle hulpbronne beskikbaar nie, hulle is maar net nog n statistiek. Dit is jammer dat hy sy lewe so moes verloor. Dit is egter die nuwe SA.

lh

Generaal Sitole, ek stem 100% saam met jou. ‘n Aanval op enige Polisie beampte, is ‘n aanval op ‘n Nasie! Ek wonder net wat gebeur met die 2 magtelose Polisie manne van Sunnyside wat rondgepluk, met bakstene gegooi en verneder was deur ‘n menigte buitelanders ? Het dit nie tyd geword dat ons manne en vroue in blou die instruksie kry om hulself en hul kollegas te verdedig teen die tipe van gedrag nie? Ons Polisie diens word ‘n bespotting van gemaak . . .

Cherokee

Klink asof bedoel word ‘polisiebeamptes is die nasie’. Boere en ander is dus buitestaanders.

Alida

Vertel hom daardie storie. Die SAPD is veronderstel om vrees in te boesem. Die kriminele skiet voor die voet. Die SAPD moet opdrag van ou Cele kry om hulle self te verdedig en te skiet om dood te skiet. Dan eers sal hulle respek hê vir die SAPD.

JWC

Tragies en simpatie met oorledene se naasbestaandes…. Suid Afrika is op ‘n gevaarlike pad geplaas deur die ANC – die misdaad onder hulle patetiese “leierskap” is totaal buite beheer en was nog NOOIT voorheen so ongekend nie. Dan ook; Is een se dood meer belangrik as ‘n ander… Wat van ELKE plaasmoord? Word dit ook met dieselfde dringendheid ondersoek?