Die Springbok-losskakel Handré Pollard en sy vrou, Marise, se babaseun het vandeesweek sy opwagting gemaak.
Luidens ʼn inskrywing op die skopsensasie se Instagram-profiel is klein Hunter André Pollard op 25 April gebore.
“Ons grootste seëning en liefde,” het Pollard en Marise by ʼn foto van hulle en hul nuweling geskryf. Op die pragtige swart-wit foto lê ʼn piepklein Hunter snoesig in Marise se arms met ʼn mussie op sy kop. Die foto is in die hospitaal geneem.
Volgens die inskrywing het Hunter by geboorte 3,6 kg geweeg. Hy is 52 cm lank.
Springbok Eben Etzebeth en sy vrou, Anlia, het in Januarie vanjaar hul eersteling verwelkom, maar nie veel oor hul pienkvoet verklap nie. Skrumskakel Faf de Klerk en sy vrou, Miné, het einde Februarie ouers geword.
Klein Remi-Ré de Klerk is op 37 weke en vier dae gebore. Sy was 48 cm lank en het die skaal by geboorte op 2,85 kg laat stilstaan.
Malcolm Marx en Herschel Jantjies is saam met De Klerk, Etzebeth en Pollard deel van die 2024-pappaklub.
Baie geluk!