R100 000-beloning ná DA-man se moord

Raadslid Nhlalayenza Ndlovu. (Foto: Facebook)

Die uMngeni-munisipaliteit in KwaZulu-Natal het Woensdag ʼn R100 000-belonging uitgeloof vir inligting wat tot die skuldbevinding van die moordenaars van raadslid Nhlalayenza Ndlovu sal lei.

Ndlovu, die DA se hoofsweep in die munisipaliteit, is Dinsdagaand koelbloedig in sy huis doodgeskiet, terwyl sy vrou, kinders en hul oppasser teenwoordig was. Nie minder nie as tien skote is na bewering afgevuur voordat Ndlovu se moordenaars op die vlug geslaan het.

Chris Pappas, die burgemeester, sê Ndlovu is nóg ʼn slagoffer van die wetteloosheid en geweld wat in die land en binne die politieke stelsel heers.

“Ndlovu kan nie nóg ʼn statistiek word in die voortslepende slagting van raadslede in KwaZulu-Natal nie,” sê Pappas.

Die burgemeester het ʼn skrywe aan verskeie owerhede gestuur, insluitend die minister van polisie, oor die saak, maar nog geen terugvoer ontvang nie.

Hy sê die munisipaliteit sal saam met die polisie werk om te verseker dat die saak deeglik ondersoek word.

In hierdie stadium is die motiewe agter die aanval nie duidelik nie, maar volgens Pappas is daar inligting wat daarop dui dat dit dalk ʼn huurmoord was wat plaaslik georganiseer is.

“Die raadslid het ook verlede week ʼn persoon uitgewys wat hy geglo het ʼn bedreiging vir sy veiligheid was. Ek het reeds hierdie inligting aan die polisie verskaf,” sê hy.

Pappas het sy medelye met Ndlovu se geliefdes betuig, wat eers later die besonderhede oor sy begrafnis bekend sal maak.

Die munisipaliteit sal ʼn afsonderlike gedenkdiens in oorleg met Ndlovu se familie hou.

Pappas het Ndlovu as “ʼn vredemaker” beskryf “wie se kalm houding en volwasse benadering tot gemeenskapsverwante sake van sy mees onvergeetlike kenmerke as ʼn leier was”.

“Sy opoffering vir die gemeenskap sal ons aanvuur om aan te hou veg vir ʼn beter munisipaliteit en provinsie.”