Radelose boere versper Vrystaat-pad

Boere versper die S86 naby Allanridge in die Vrystaat. (Foto: Vrystaat Landbou)

Boere in die Allanridge-omgewing het vanoggend die S86 met bakkies en sleepwaens versper om hul misnoeë met die departement van paaie te demonstreer, weens sy onvermoë om die R30-pad te herstel.

Maroela Media het by Uys van Heerden, die paaieverteenwoordiger van die Allanridge Boerevereniging, gaan uitvind hoe sake tot by hierdie punt gekom het.

“Die grond in ons omgewing se watertafel is baie vlak en met die baie reën dreineer die water na die panne toe en nou het dit opgestoot na die R30 toe. Die departement het toe 300 m van die pad met grond gelig sodat die ryvlak bo die water uitsteek.

“Ongelukkig skrik motoriste wat veral in die donker teen ʼn hoë spoed van die teer na die grond oorgaan en dan gooi hulle hul voertuie om,” sê hy. “Die panne langs die pad is tot twee meter diep en die insittendes verdrink dan as hul voertuie in die water beland. Sedert die reënseisoen begin het, het daar al ongeveer 25 mense gesterf.”

Intussen is daar borde opgesit en verkeerskonstabels aan weerskante van die opgeboude pad ontplooi, maar in ʼn onlangse geval het ʼn voertuig net hul waarskuwingsligte geïgnoreer en ook in die water beland.

Volgens gerugte is 80% van die noodlottige gevalle weens dronkbestuur veroorsaak.

‘n Sleepwa verwoord boere se misnoeë. (Foto: Vrystaat Landbou)

“Tans het die departement die pad gesluit omdat daar te veel lewens verloor is en daar is nou ʼn stootskraper besig om hoë walle te stoot om die pad af te sper. “

Van Heerden sê daar is eintlik ʼn goedkoop en eenvoudige oplossing, “maar dit kom voor asof die departement nie eers geld daarvoor het nie, want die verteenwoordiger het gesê die kwotasie is te hoog. Die departement hoef net dreunstroke op die teer aan weerskante van die opgeboude pad aan te bring sodat die motoriste gewaarsku kan word en stadiger ry. Ek het nou al voorgestel om self die teer te skenk om die dreunstroke aan te bring, maar ek wag nog vir ʼn antwoord.”

Die verkeer van die R30 word nou na die S86 herlei en dit hou nie net ’n gevaar vir die publiek in nie, maar ook vir die boere en hul werkers, sê Rudi Jansen van Vuuren, ’n boer van die omgewing.

“Bowendien is dit nou strooptyd en daar beweeg trekkers en stropers op die pad. Sekere motoriste ry baie onverskillig en ons wil verhoed dat iemand seerkry. Dit maak ook nie sin dat die departement mense op ’n 18 km-ompadroete forseer terwyl hulle slegs die 300 m-stuk kan herstel nie.”

Verkeer hoop op nadat boere die S-86 versper het. (Foto: Vrystaat Landbou)

Die S86 loop naby Van Heerden se huis verby en hy sê dié sekondêre pad kan glad nie die verkeer hanteer nie. “Tydens Paasnaweek het daar tussen 400 en 500 voertuie per uur verbygekom.”

Intussen sê dr. Jack Armour, kommersiële bestuurder van Vrystaat Landbou (VL), dat die organisasie al geruime tyd poog om met die Vrystaatse premier oor die paaiekwessie in die provinsie te vergader, maar dat daar net geen reaksie of terugvoer ontvang word nie.

Volgens Van Heerden is daar onlangs ʼn skaap of bok in die water verdrink om die “bose geeste” wat die sterftes veroorsaak, te verdryf.

Uit radeloosheid het ʼn groep boere vanoggend die S86 afgesper. “Die ouens het vir ʼn uur die pad toegemaak wat ontwrigting veroorsaak het. Baie van die motoriste was egter simpatiek teenoor ons aksie, want hulle weet dat dit op die lang duur vir hulle tot voordeel sal wees. Indien ons nie reaksie kry nie, sal ons volgende keer die pad langer toemaak,” sê Van Heerden.