Renosterstroper loop uiteindelik rieme styf

Argieffoto

’n Renosterstroper wat by drie verskillende geleenthede en elke keer met verskillende medepligtiges in die Krugerwildtuin in hegtenis geneem is, is Donderdag tot effektief 32 jaar tronkstraf in die Skukuza-streekhof gevonnis.

Forster Lubisi (43) is skuldig bevind aan drie aanklagte van onwettige betreding, twee aanklagte van die besit van ’n verbode vuurwapen met ’n reeksnommer wat uitgewis is, die besit van ammunisie, die besit van ’n gevaarlike wapen, die stroop van ’n renoster en die besit van ’n ongelisensieerde vuurwapen.

Hy het skuld beken op ál die misdade, sê Monica Nyuswa, woordvoerder van die Nasionale Vervolgingsgesag (NVG).

Lubisi is aanvanklik in April 2015 in hegtenis geneem nadat veldwagters op patrollie in Skukuza geweerskote gehoor en spore gevolg het. Lubisi is kort daarna saam met sy medebeskuldigde, Nelson Ndlovu, in besit van ’n vuurwapen, ammunisie en ’n byl aangetref.

’n Renosterkarkas is later gevind.

Lubisi en Ndlovu is destyds op borgtog vrygelaat.

Lubisi is in Julie 2018 wéér in hegtenis geneem – dié keer met ’n ander medepligtige, Een Sihlangu, nadat hulle in besit van ’n jaggeweer en ammunisie betrap is. Hy is egter weer op borgtog vrygelaat.

In April 2021 is Lubisi vir ’n derde keer in hegtenis geneem nadat hy en ’n ander medepligtige die Krugerwildtuin onwettig binnegegaan het en later in besit van ’n jaggeweer, ammunisie en drie messe gevind is.

Lubisi is ná die inhegtenisneming eindelik borgtog geweier en die drie sake is later in die hof saamgevoeg.

Nyuswa sê die staatsaanklaer in die saak het ter verswaring van vonnis positiewe DNS-resultate ingehandig wat Lubisi met die oortredings verbind. “Dit sluit in ’n ballistiese verslag wat die vuurwapen wat tydens die pleeg van die misdryf gebruik is, uitwys as dieselfde wapen wat in sy besit gevind is.”

Die verhoor van twee van Lubisi se medebeskuldigdes word op 2 Februarie 2023 in die Skukuza-streekhof hervat.