SA span doen tweede suksesvolle penisoorplanting

Foto: US

ʼn Span van die Universiteit Stellenbosch (US) en die Tygerberg Akademiese Hospitaal het onlangs ʼn tweede penisoorplanting gedoen.

Dit is die eerste keer ter wêreld dat ʼn mediese sentrum hierdie prosedure twee keer suksesvol uitvoer.

Prof. André van der Merwe, hoof van die urologie-afdeling aan die US se fakulteit Geneeskunde en Gesondheidswetenskappe (FGGW), het die marathon-operasie van nege en ʼn half uur gelei wat op 21 April by die Tygerberg-hospitaal in Kaapstad uitgevoer is.

Die ontvanger was ʼn 40-jarige man wat sy penis 17 jaar gelede weens komplikasies met ʼn tradisionele besnydenis verloor het. Sy identiteit word weens etiese redes beskerm.

“Hy is beslis een van die gelukkigste pasiënte wat ons al in ons afdeling gesien het. Hy vaar merkwaardig goed. Daar is geen tekens van verwerping nie en dit lyk of al die herverbinde strukture goed werk,” sê Van der Merwe.

Die pasiënt gaan na verwagting binne ses maande ná die oorplanting alle urinêre en reproduktiewe funksies van die orgaan herwin. ʼn Kleurverskil tussen die ontvanger en die skenkerorgaan sal ses tot agt maande ná die operasie met mediese tatoeëring reggestel word.

“Die sukses van hierdie prosedure in die hande van ons oorplantingspan getuig van die hoë vlak van vaardigheid en kundigheid wat in Suid-Afrika se openbare gesondheidsektor bestaan,” het prof. Jimmy Volmink, dekaan van die FGGW, gesê. “Die span se vermoë om ʼn balans te handhaaf tussen enersyds deernisvolle en etiese pasiëntsorg, en andersyds die doeltreffende aanwending van skaars hulpbronne is ook rede vir groot trots.”

Die mediese span. Foto: US

“Dit is ʼn merkwaardige baanbrekersprosedure. Ek wil graag die Tygerberg-hospitaal en die US-chirurge vir hul uitmuntende werk bedank. Tradisionele besnyding het talle jong Suid-Afrikaanse lewens geëis. Hierdie pasiënt se lewe sal nooit weer dieselfde wees nie,” het dr. Nomafrench Mbombo, Wes-Kaapse minister van gesondheid, gesê.

“Pasiënte beskryf ʼn penisoorplanting ‘soos om ʼn nuwe lewe te kry’. Vir hierdie mans definieer hul penis hul manlikheid en die verlies aan hierdie orgaan veroorsaak geweldige emosionele en sielkundige ellende,” het dr. Amir Zarrabi van die urologie-afdeling en lid van die oorplantingspan gesê.  “Ek sien gewoonlik gevalle van gedeeltelike of algehele amputasie in Julie en Desember – die tydperke wanneer tradisionele besnyding uitgevoer word.”

“Ons is verheug vir die pasiënt se onthalwe, asook oor die verandering wat dit in sy lewe teweeg bring,” het dr. Alexander Zühlke, hoof van die FGGW se afdeling plastiese en rekonstruktiewe chirurgie, gesê. “Dit is ook ʼn groot prestasie om deel van ʼn span te wees wat twee suksesvolle penisoorplantings gedoen het.”

Die span het bestaan uit Van der Merwe, Zühlke, prof. Rafique Moosa, hoof van die FGGW se Departement Geneeskunde, Zarrabi en dr. Zamira Keyser van die Tygerberg-hospitaal. Hulle is bygestaan deur oorplantingskoördineerders, narkotiseurs, teaterverpleegkundiges, ʼn sielkundige, ʼn etikus en ander ondersteuningspersoneel.

Van der Merwe en sy span het in Desember 2014 die eerste suksesvolle penisoorplanting ter wêreld uitgevoer en langer as twee jaar later “vaar die pasiënt geestelik én liggaamlik uitstekend”, sê Van der Merwe. “Hy leef ʼn normale lewe. Sy urinêre en seksuele funksies is weer normaal en hy het bykans vergeet hy het ʼn oorplanting gehad.”

Penisverminking kom meer algemeen in Suid-Afrika as elders voor weens komplikasies van rituele besnydings wat as deel van tradisionele deurgangsrites in sommige kulture op jong mans uitgevoer word. Daar is geen formele rekord van die jaarlikse getal penisamputasies weens tradisionele besnydings nie, maar een studie noem ʼn syfer van 55 net in die Oos-Kaap. Kundiges skat tot 250 gedeeltelike en algehele amputasies vind elke jaar landwyd plaas. Selfmoorde weens hierdie prosedure word ook aangeteken.

Foto: US

“Die Universiteit Stellenbosch en die Tygerberg-hospitaal is daartoe verbind om kostedoeltreffende metodes te vind om hierdie mans te help,” sê Van der Merwe. Die prosedure het deel uitgemaak van ʼn konsep-proefstudie om ʼn kostedoeltreffende penisoorplantingsprosedure te ontwikkel wat in ʼn tipiese teateromgewing in ʼn openbare Suid-Afrikaanse hospitaal uitgevoer kan word. Danksy lesse wat uit die eerste oorplanting geleer is, kon Van der Merwe en sy span die koste van die tweede prosedure aansienlik sny.

Die grootste uitdaging vir hierdie studie is orgaanskenking. “Ek dink die gebrek aan penisoorplantings sedert ons die eerste een in 2014 uitgevoer het, is grootliks die gevolg van ʼn tekort aan skenkers. Dit is dalk makliker om ʼn orgaan te skenk wat ʼn mens nie kan sien nie, soos ʼn nier, as iets soos ʼn hand of ʼn penis,” sê Van der Merwe.

“Ons is uiters dankbaar jeens die skenker se familie wat nie net die penis geskenk het nie, maar ook die niere, vel en korneas van hul geliefde seun. Hulle verander die lewe van talle pasiënte danksy hierdie skenking.”

Die eerste suksesvolle penisoorplanting ter wêreld is op 11 Desember 2014 deur Van der Merwe en sy span by die Tygerberg-hospitaal in Kaapstad uitgevoer.

Die tweede een is ʼn jaar en ʼn half later, op 16 Mei 2016, by die Massachusetts-hospitaal in Boston gedoen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

57 Kommentare

jongste oudste gewildste
Ai

Ja nee, behoort ons toerisme n hupstoot te gee… As ek die nuus so lees is daar nou so baie vroue wat mans wil wees en mans wat vroue wil wees en met die swak rand en die verwikkeling behoort die span dokters volgeboek te wees vir die volgende paar jaar.

pie in the sky

Girls gaan skrik vir daai tatoo…

zahn

Uitstekend. Dat hy dankbaar moet wees, staan soos ‘n paal bo water!

m

Nou lekker gelag pie in the sky.

Johann Marx

Toe Dr Chris Barnard oorlede is het die gemeenskap waar hy groot geword het ‘n reuse kunswerk van ‘n rooi hart op die dorpsplein laat oprig tot sy nagedagtenis en prestasies. Wonder wat gaan hulle vir Dr van der Merwe “oprig”??