Sakeman sê oor ‘vernedering’ ná onregmatige inhegtenisneming

Dr. Hinner Köster en sy lewensmaat, Ensli Strydom. (Foto: Verksaf deur AfriForum)

’n Sakeman van Pretoria het ’n klag teen die Suid-Afrikaanse Polisiediens (SAPD) aanhangig gemaak nadat hy en twee ander die jongste slagoffers van beweerde polisiemagsmisbruik geword het.

Dr. Hinner Köster, sy lewensmaat, Ensli Strydom, en nóg ’n inwoner van die Silver Lakes-landgoed in Pretoria is sowat twee weke gelede in hegtenis geneem nadat hulle enkele minute nadat die aandklokreël in werking getree het by dié landgoed in die ooste van die stad aangekom het.

“Dit is een van die vernederendste ondervindings in ons lewens en ons kan dit eenvoudig nie net so aanvaar nie. Hierdie kwaadwillige optrede deur polisiebeamptes vind daagliks plaas omdat hulle óf nie opgelei is nie, óf nie wetgewing rakende arrestasie ken nie óf hulle eenvoudig nie daaraan steur om onskuldige mense soos kriminele te behandel nie. Dit moet end kry en daar moet ’n voorbeeld van sulke beamptes gemaak word.”

Die drie is die betrokke aand weens die aanwysings op hul GPS-toestel op pad huis toe effens opgehou. Inhegtenisneming en hardhandige behandeling deur die polisie sou later die aand volg.

Köster, uitvoerende direkteur en aandeelhouer van die Kaonne Investments-groep en president van die Universiteit van Pretoria se konvokasie, vertel dat hulle die aand van 12 Februarie omstreeks 22:45 saam met die ander inwoner van Menlopark af ’n saamrygeleentheid gekry het en op pad huis toe was. Hul GPS-toestel het hulle egter deur woongebiede op pad huis toe geneem en is hulle gevolglik effens opgehou.

“Eerder as om vinniger te ry en die spoedgrens te oorskry, het ons besluit om nie die vyf minute te probeer opmaak om voor die aanvang van aandklokreël by die huis te probeer kom nie,” verduidelik hy.

Die drie het die betrokke aand van die N4-hoofweg op Solomon Mahlangu-rylaan gedraai en opgemerk dat ’n polisievoertuig uit die rigting van Mamelodi hulle agtervolg. Die voertuig se blou ligte is geflits en daar is aangedui dat hulle van die pad moet aftrek.

Argieffoto ter illustrasie

“Ons het die veiligheidsrisiko ontleed na aanleiding van heelwat mediadekking die afgelope tyd oor voertuie met vals polisieligte en het besluit om stadig tot by die Silver Lakes-hek sowat ’n kilometer of twee verder te ry.”

Die ingang tot die landgoed is goed verlig en het sekuriteitswagte en -kameras. “Ons het nie vir die polisie probeer wegjaag nie en juis ons spoed nog heelwat verminder. Hulle het ons egter steeds op ’n gevaarlike wyse by ’n blinde streep van die pad probeer dwing en in die proses amper teen ’n aankomende voertuig gebots.”

Köster vertel dat een van die polisiebeamptes by hul aankoms by die hek nader gestap het. Die polisiebeampte was glo uit die staanspoor aggressief. Hy wou ook glad nie homself identifiseer nie.

“Hy het net herhaaldelik gesê ‘my naam is my naam’ terwyl hy voorts die bestuurder van die motor daarvan beskuldig het dat sy roekeloos bestuur het, omdat sy nie dadelik stilgehou het nie.

“Ek het aan hom verduidelik dat met al die negatiewe berigte wat ’n mens hoor oor misdadigers wat hulle as polisiebeamptes voordoen, ons besluit het om eerder tot by ’n veilige punt te ry voor ons stop. Op grond daarvan het die beampte my beskuldig dat ek aangedui het dat die polisie nutteloos is.”

Soos die noodlot dit wou hê, het die bestuurder van die motor nie haar bestuurslisensie by haar gehad nie. Sy het dit egter binne minute aan die polisiebeamptes gewys nadat sy haar seun binne die landgoed gebel het om dit te bring.

“Die polisie het herhaaldelik ongevraagde kru-taal gebruik en onder meer gesê ‘shut your dirty mouth’ en ook dat ons nie moet dink ons is onaantasbaar omdat ons agter hoë mure bly nie,” vertel Köster.

Daar is herhaaldelik aan die een polisiebeampte gevra waarvoor hy hulle werklik wou aankla en beboet. Die polisiebeamptes het eers aangedui dat hulle aangekla gaan word vir roekelose bestuur. Kort daarna wou die polisiebeamptes die bestuurder beboet oor haar lisensie wat sy nie dadelik kon wys nie, en toe weer omdat die drie nie maskers in die voertuig aangehad het nie.

Volgens Köster was die oortreding van die aandklokreël in daardie stadium nog glad nie genoem nie. Drie ander motors het ook die Silver Lakes-landgoed na 23:00 binne gegaan nadat Köster-hulle reeds voorgekeer is en die polisiebeamptes het hulle nie daaraan gesteur nie.

Inhegtenisneming, aanhouding

Argieffoto: SAPD

Die polisiebeamptes het uiteindelik aangedui dat die bestuurder beboet moet word, maar dat dit net by die Silverton-polisiestasie gedoen kan word. “Selfs nadat ons aangedring het om die boete op die plek te kry, al het ons steeds nie geweet het waarvoor nie, en omdat ons onveilig en agterdogtig gevoel het oor wat by die polisiekantoor kon gebeur, het hulle gesê hulle sal hulp inroep en ons met geweld in hegtenis neem as ons nie vrywillig saam met hulle polisiestasie toe ry nie.”

Die polisiebeamptes het toe die hulp van ander vrouepolisiebeamptes ingeroep. “Aanvanklik wou hulle slegs die bestuurder op haar eie polisiestasie toe neem om ’n boete uit te reik. Ons was nie hiermee gemaklik nie en het geweier. Toe het hulle gesê hulle gaan ons op die plek in hegtenis neem en met die vangwa polisiestasie toe vat. Ons toe besluit om die bestuurder van die voertuig te ondersteun en saam met haar na die polisiestasie te ry om die boete te kry sodat ons net weer veilig by die huis kon kom.”

Köster, Strydom, die bestuurder van die motor en dié se seun is uiteindelik in die bestuurder se motor na die polisiestasie. By hul aankoms is die bestuurder van die motor en haar seun by die polisiestasie die gebou binne met die veronderstelling dat sy net beboet gaan word.

Intussen het Köster en Strydom in die motor gewag. Hulle het in dié stadium nie gedink dat hulle as passasiers skuldig is aan enige van die klagte wat voorgehou is nie. Verskeie polisiebeamptes het egter toe om die motor kom staan en aangedui dat hulle óók in hegtenis geneem word. Die kwessie van die aandklokreël is toe vir die eerste keer geopper.

Later sou hulle uitvind dat die tyd op die klagstaat as 23:30 aangedui is eerder as die ongeveer 23:05 toe hulle voor die landgoed gestop het. Hulle is in dié stadium aangekla van die oortreding van die aandklokreël en die bied van weerstand teen inhegtenisneming.

“Eersgenoemde is debatteerbaar en sou op die ergste ʼn boete regverdig indien vyf minute laat wel ʼn ernstige probleem is, maar laasgenoemde is ’n blatante leuen,” sê Köster nou.

Hy sê dat daar vroeër in die polisiestasie aan Strydom en die bestuurder gepluk is. Die polisiebeamptes het glo ook probeer om Strydom se ringe van haar vingers te ruk waarna dit gebloei het. Die twee vroue is ook met pepersproei bygedam en die bestuurder is so hard gestamp dat sy op haar rug te lande gekom het.

Die drie is die aand in die aanhoudingselle geplaas. Köster is in ’n ander sel as die vroue geplaas waar vier mans later aangesluit het wat van “soortgelyke misdrywe” beskuldig is. Die sel was klein, baie vuil en het erg na urine geruik.

“Ons moes langs mekaar lê op baie dun matrasse om in te pas en van sosiale afstand was geen sprake nie. Nêrens was daar ook ontsmettingsmiddels sigbaar om ons teen Covid-19 te beskerm nie.”

Die drie is uiteindelik die volgende oggend vrygelaat “danksy ’n polisiekaptein wat bewus geraak het van die onregverdige optrede,” sê Köster.

’n Siviele eis is teen die betrokke polisiebeamptes ingedien.

 Inligting met vergunning van dr. Hinner Köster en AfriForum verskaf – red.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Genis

Dagvaar die rook uit die KFC bende uit… Rassiste wat onskuldige teiken… Maar misdaat na die aanklokreel floreer….

Willem

Dagvaar die klomp

Casper

Ons weet seker almal teen hierdie tyd hoekom hulle so opgetreë het.

Marius

Dit is wat gebeur as jy behep is oor mag en om n punt te bewys . As ek nou nie van beter geweet het nie dan sou ek gedink het dit het iets met rassisme te doen . Dit is reg meneer dagvaar die rook uit SAPS uit want dit is verby swak .

Kokerboom

Identifiseer die polisieboewe en skors hulle. Hul is GLAD nie bevoeg vir hul werk. Ek skaam my vir die gemors wat in die Polisiediens bestaan