Hein Heath (Foto: Facebook)
ʼn Suid-Afrikaner en nog twee mense is dood nadat ʼn helikopter vroeër die week in die Demokratiese Republiek die Kongo neergestort het.
Die helikopter het Maandag, etlike minute nadat dit in gure weer by ’n myn by Kambove in die Haut-Katanga-provinsie opgestyg het, in ’n ravyn neergestort.
ʼn Franse vlieënier, die Suid-Afrikaner en ’n Poolse burger is in die ongeluk dood. Die helikopter, wat deur ’n kobalt-en-koperfirma genaamd Boss Mining besit word, was onderweg na Kolwezi in die naburige Lualaba-provinsie.
Die Suid-Afrikaner is intussen as die 34-jarige Hein Heath geïdentifiseer, ʼn oudleerling van die Hoërskool Brandwag in Kariega.
Heath was ten tyde van sy dood aan die G4S-veiligheidsmaatskappy verbonde nadat hy vroeër in die Franse Vreemdelegioen gedien het.
“Ons het geen antwoorde, moet asb nie vrae vra nie [sic],” het Susan Heath, Hein se ma, in ʼn Facebook-inskrywing gesê met ʼn foto van haar seun. “Rus sag my liefste jongseun. So trots op jou.”
Baie hartseer dat soveel wit mense in ander lande moet werk agv die diskriminasie teen wit minderhede in Suid-Afrika, sterkte aan die naasbestaandes.
Sterkte aan sy gesin en almal wat hom geken het. Mag onse Liewe Heer julle deur hierdie moeilike tyd wat nou voorle, dra.