Skoolhoof met aankoms by skool doodgeskiet

Buyani Primary School in Finetown (Foto: Facebook)

Die skoolhoof van Buyani Primary School in Finetown in Johannesburg is in sy motor doodgeskiet nadat hy Vrydagoggend by die skoolterrein ingery het.

Hy is verskeie kere geskiet, het kapt. Kay Makhubele, woordvoerder van die polisie, gesê en bygevoeg dat die polisie omstreeks 07:00 na die skool ontbied is.

’n Saak van moord word intussen ondersoek hoewel niemand nog in verband met die skoolhoof se skietdood in hegtenis geneem is nie.

Maroela Media het vroeër vandag berig die LUR vir onderwys in Gauteng, Panyaza Lesufi, het vanoggend sy skok oor die voorval uitgespreek en sou die skool vroeër vandag besoek.

“Ons is uiters geskok en woedend oor die nuus van die skietery vanoggend in Finetown. Ons veroordeel die skietdood van die skoolhoof van Buyani Primary, maak nie saak wat die motief agter die hartelose daad is nie, en betuig ons medelye met sy familie, vriende en kollegas,” het die LUR in ’n verklaring gesê.

Die Gautengse departement van onderwys het ’n beroep op wetstoepassers gedoen om alles in hul vermoë te doen om te verseker dat die skoolhoof se moordenaar(s) aan die pen ry.

Die departement se sielkundig-maatskaplike eenheid sou ook die skool besoek om die nodige hulp en ondersteuning aan leerders en onderwysers te bied.

Die departement het nog nie meer inligting rakende sy besoek aan die skool bekend gemaak nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
Snowball

Misdaadhool. ANC maaksel.

Louis

Is hy met ‘n wettige of onwettige wapen geskiet? Vra namens ‘n vriend

lodewyk

Yip dit is wat gebeur as jou regering nie misdaad kan beheer nie,en die kriminele elemente oorspoel na ons skole??

Tipper

Wie is nou aan die bewind,die groot vader van misdaad.

Persheks Adri

En so karring hulle nou wéér vandag oor die vuurwapen wet! Ek is seker dis ‘n gelisensieerde wapen wat gebruik is gggmmmfff