‘Stráf hulle’, sê Cele oor polisiemoordenaars

(Argieffoto: SA Polisie)

Die minister van polisie, Bheki Cele, het sy vroeëre oproep vir swaarder strawwer herhaal vir diegene wat polisiebeamptes aanval en vermoor.

Sy oproep kom nadat die polisie in die Wes-Kaap verskeie verdagtes aangekeer het wat volgens ondersoekers die moorde op twee Kraaifonteinse polisiebeamptes sal help oplos.

Sers. Mnakwazo Mdoko (46) en konst. Mninawa Breakfast (28) is Sondag in die vroeë oggendure tydens ʼn patrollie in Bloekombos in ʼn lokval gelei en doodgeskiet. Hul dienspistole is gebuit.

ʼn 32-jarige man het reeds in die hof verskyn in verband met die aanval en bly tot sy volgende hofverskyning in aanhouding.

Donderdagaand het ʼn intelligensiegedrewe operasie gelei tot die inhegtenisneming van nege verdagtes in Khayelitsha wat met ongelisensieerde vuurwapens betrap is, sê Lirandzu Themba, Cele se woordvoerder.

Twee van dié wapens behoort aan die vermoorde polisielede.

Cele het die polisie vir die jongste deurbraak geloof.

“Dit is die gevolg van gesamentlike pogings deur die Valke, die misdaadintelligensie-eenheid, die blitspatrollie en die taktiese reaksiespan wat nou vrugte afwerp. Ek voel bemoedig deurdat die polisie in die provinsie die taak om die polisiemoordenaars te vind, lewend of dood, uitgevoer het,” het die minister gesê.

Cele sê die klopjag beteken daar is nou boonop minder onwettige vuurwapens in Kaapstad se strate.

Altesame sewe polisiebeamptes is die afgelope 15 dae landwyd vermoor.

Cele het ʼn beroep op mense gedoen om saam met die polisie te werk en inligting te verskaf oor diegene wat misdade teen hulle én die polisie pleeg, sodat die boosdoeners voor stok gekry kan word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Jaco

Nie net polisie moorde,alle moorde. Bring doodstraf terug.

Willem

Alle maar alle moordenaars moet hewig gestraf word

Boerkind

Swaarder straf vir polisiemoorde – regso, maar wat van plaasmoorde – wat van ALLE moorde?? Bring die doodstraf terug!!

Anel

En wat van die wat die wat gewone burgers, kinders en boere vermoor? Moet alle moordenaars nie dieselfde gestraf word nie? Hoe kan hy besluit wie se lewe is belangriker? Almal se lewens is ewe belangrik!!!

Chris

Mense wat gevang word vir moord op enige onskuldige persoon of verkragtings moet, soos in die Bybelse tyd in die openbaar tereggestel word. Laat die publiek hul stenig. As ‘n burger nie die land se wette gehoorsaam nie, moet hulle wat dit wel doen, die teregstelling behartig. Dit klink wreed, maar gaan baie probleme in ons lieflike land oplos.