Argieffoto
Die V&A Waterfront, een van Kaapstad se gewildste toeristebestemmings, het besluit om vanjaar Oujaarsaand sónder vuurwerk te vier. Die besluit kom ná klagtes van die publiek onder leiding van die organisasies Voices for African Wildlife en Beauty Without Cruelty (BWC).
Meer as 35 diereregtegroepe het Saterdag tydens ’n protesaksie briewe met hul griewe oor die gebruik van vuurwerk aan Narriman Taliep, uitvoerende bestuurder van die Waterfront, oorhandig.
Donald Kau, woordvoerder van die V&A Waterfront, sê hulle neem kennis van die publiek se kommer en sê die Waterfront het die afgelope paar jaar verskeie klagtes oor die gebruik van vuurwerk ontvang.
“Ons het die boodskap ontvang dat ons meer volhoubare en omgewingsvriendelike opsies vir ons Nuwejaarsviering moet ondersoek. Daarbenewens gaan ons nou saam met die Stad Kaapstad werk om moontlike oplossings vir die publiek se kommer te vind,” sê Kau.
BWC het verskeie alternatiewe metodes voorgestel wat reeds in die buiteland gebruik word en ook meer omgewings- en dierevriendelik is.
Kau sê hulle ondersoek onder meer die moontlike gebruik van laserliggies wat reeds in Doebai tydens Nuwejaarviering daar gebruik word.
JP Smith, Kaapstad se burgemeesterskomiteelid vir veiligheid en sekuriteit, het gesê die stad sal die bykomende koste wat aangegaan moet word om alternatiewe vir vuurwerk te probeer vind, help finansier.
Smith sê die onwettige afvuur van vuurwerk op Oujaarsaand bly ʼn probleem.
“Die meeste brande, of beserings wat kinders oor Nuwejaar opdoen, is weens vuurwerk. Ons doen ’n beroep op ouers om ander maniere te vind om Nuwejaar saam met hul kinders te vier. Gooi mekaar met gekleurde verfpoeier en neem daarna ’n stort. Los die vuurwerk,” het Smith gevra.
BWC sê hy sal die kwessie weer aanstaande jaar met die Waterfront opvolg.
Heeltemal reg. Ons moet krag spaar. Toeriste kan sien wat hier aangaan.
Nou wonder ek wat van die manne aan swaar weer? Hier op die hoëveld is dit nogal algemeen
Welgedaan…hoop ander volg hul voorbeeld!
Ek stem volkome saam met die algehele verbod op vuurwerke. Veral die onwettige verkoop en afskiet van klappers en vuurwerke in woongebiede. Dis die grootste probleem. Georganiseerde afskiet behoort nie ‘n probleem te wees nie.
Die vuurwerke in die Waterfront was nog altyd ‘n groot trekpleister, en ons as gesin, wat NOOIT vakansie vat nie, gaan al die afgelope 3 jaar oujaarsaand in Blouberg oorslaap net om die vuurwerke te kan sien. Daardie een nag is al vakansie wat ons ken en wil dit graag spesiaal maak.
Ek het wel al gewonder hoekom hulle dit so naby geboude gebiede afvuur. Hoekom kan hulle dit nie net skuif na die stuk grond waar die helikopters vandaan opstyg nie? Dis sekerlik ver genoeg van enige troeteldiere, ens. Of gebruik die punt van die hawe muur. Dis so te sê in die see en ver weg van alles, maar almal in en om die baai kan dit nog steeds sien. Ja dit is ‘n euwel, maar dis nogtans jammer dat dit heeltemal weggeneem word.
Ek sien uit na die laserlig opsie. Dit behoort baie interesssant en selfs mooier as die vuurwerke te wees. Jy kans soveel meer daarmee doen.
Uitstekende besluit!
Nou kan ek Oujaarsaand in Durban gaan vier, en daar my geld spandeer. Hulle skiet darem nog vuurwerke daar af! Kom saam mense. Dit kos maar net ‘n vliegtuig kaartjie, en ‘n aand se verblyf in ‘n hotel.
V&A behoort `n medalje te kry vir die besluit. Ek kan waaragtig nie glo dat daar mense is wat nog vuurwerke probeer goed praat nie. Ek is nie `n sogenaamde “groene” nie, maar net `n mens wat empatie het en wat genoeg gesien het van diere wat uitgesit moes word agv beserings ensovoorts as gevolg van vuurwerke. Die wat wil boikot: DOEN DIT ASSEBLIEF!!! Dan meer mense wat omgee, sulke feeste en vertonings bywoon.
Medalje se alie man….jy het dit duidelik nog nooit beleef nie! Gaan gerus saam Johan Durban toe…surprise surprise ….
Wonder of die beswaarders ook n petisie gaan opstel as daar op oujaar n lekker swaar donderstorm oor die Kaap los bars.
Wens eerder die beswaarders wil iets doen oor honde wat heel nag plaf en my regte skend.
Hoor hoor!
Stem saam jou Arrie !!
Belaglik, raak nou ‘n “nanny state”. Die waterfront is mos redelik ver weg van enige residensiële area. Genade gun die mense hul plesiertjie vir een nag.
Welgedaan V&A met jul besluit. Wens ander instansies, groepe en mense wil dit ook doen. Vuurwerk behoort geheel en al in die land verbied te word en nie eers te koop aangebeid word nie. Verryk in elk geval net die Chinese.
En aan diegene wat vuurwerke en donderweer probeer vergelyk in hul sarkastiese opmerking. Vuurwerk is mensgemaakte en mensgedrewe en mens kan dit stop as jy wil. Donderweer is die natuur en mens kan niks daaraan doen nie.
‘n Fantastiese besluit!