Video: Departement ondersoek beddens ‘buite staatshospitaal’

Die hospitaalbeddens lê glo en verweer buite die Chris Hani-Baragwanath-hospitaal in Diepkloof.

Die Gautengse gesondheidsdepartement sê hy stel ondersoek in na ʼn video wat wys waar honderde hospitaalbeddens buite ʼn hospitaal in die wind en weer lê.

Die video is glo by die Chris Hani-Baragwanath-hospitaal in Diepkloof in Gauteng geneem.

Lesemang Matuka, woordvoerder vir die gesondheidsdepartement in Gauteng, het vanoggend aan Maroela Media gesê hulle probeer nog vasstel of die beddens wél by dié hospitaal gestoor word. Volgens Matuka is daar bewerings dat die video by die Kopanong-hospitaal in Vereeniging geneem is.

“Ons probeer vasstel waar dit is,” het Matuka gesê.

Jack Bloom, die DA se woordvoerder oor gesondheid in Gauteng, het gesê hy is bekommerd oor die video wat wys hoe die beddens buite lê en verweer.

“Talle daarvan lyk of dit nog in ʼn goeie toestand is, maar in onbeskermde toestande gaan dit vinnig agteruitgaan. Hierdie is ʼn duidelike vermorsing van staatsbates en die beddens behoort beter aangewend te word, eerder as om buite te roes. Daar is ander hospitale wat dringend beddens benodig, waar dit gebruik kan word,” het Bloom gesê.

Hy het gesê die beddens kan ook geskenk word aan nie-regeringsorganisasies wat ʼn groot nood daarvoor het.

“Hierdie [situasie] dui op ʼn gebrek aan beplanning en swak bestuur en dít is ongelukkig iets wat algemeen in die departement voorkom. Dit is ʼn vermorsing,” het Bloom gesê.

In die video, wat glo verlede Woensdag geneem is, kan gehoor word hoe die persoon wat dit geneem het, sê dat hy op die beddens afgekom het toe hy toevallig daar verbygestap het omdat hy nie nader parkeerplek kon kry nie. Die man sê dat hy sy kind in die pediatriese eenheid van die Chris Hani-Baragwanath-hospitaal gaan besoek het.

Hy skat dat daar nagenoeg 3 000 beddens rondstaan.

“So ver as wat die oog kan sien, is dit net hospitaalbeddens wat absoluut niks makeer nie. Nou vra ek vir julle vandag, waar gaan ons belastinggeld heen? Hoekom moet ons so swaar kry om ons vroue, ons kinders, ons ma’s en pa’s in staatshospitale op vloere en matrasse te laat slaap?” sê die man in die video.

Bloom het gesê die Gautengse premier, David Makhura, het onderneem om die provinsie se gesondheidsorgstelsel reg te ruk as die ANC in die nasionale verkiesing herkies word. Bloom sê egter dat die regerende party die afgelope vyf jaar al versuim om dit te doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

46 Kommentare

jongste oudste gewildste
Sê net

En daar arresteer sekuriteit jou as jy net in die verkeerde areas beweeg. Vra my, het verdwaal en was vinnig gesê ek mag nie in daardie area wees nie. Was nie van die area nie en is so bietjie rigting bedinges. Dis ñ massiewe hospitaal. Dit onthou ek.

Zenithia

Die ANC het GEEN BEHEER OOR ENIGE VAN HUL STATS DEPARTMENTE. 25 JAAR GELEDE KON N MENS NOG IN N STAATS HOSPITAAL GAAN. NOU IS DIT N DOODSTRAF! !! DIE KIESERS MOET ASB REG STEM!

Rowan Grobler

Ja ek stem saam. Dan se die anc hulle moet weer vir hulle stem. Ramaphosa se ons sal nou die land regruk en dit is 25 jaar later en die land is in sy glorie in. Kiesers moet hulle oe oopmaak

Corne

Skokkend !

jAN

vermorsing van geld …dit kan hulle die anc kaders goed doen. mnr die president jy leef in n droom wereld in 25 jaar kon julle nie die land verbeter . ook nie in die volgende 25 jaar nie….