Video: Driehoek-ouers gee mandaat vir regsaksie teen BLF

Dirk Hermann. Foto: Reint Dykema

Die vakbond Solidariteit het vandag namens verskeie ouers van die slagoffers van die Hoërskool Driehoek-skoolramp in Vanderbijlpark ʼn klag by die SAPD, asook by die Gelykheidshof, teen lede van die Black First Land First (BLF) gelê.

Die klagte is by die Vanderbijlpark-polisiekantoor ingedien. Dit volg nadat Lindsay Maasdorp, die BLF se woordvoerder, op Twitter die dood van drie leerlinge van dié skool gevier het. “I would ‘mourn’ the deaths of the victims if they turned out to be black but ‘celebrate’ them if they were white.” Hy voeg ook by: “If our God has finally intervened and our ancestors have petitioned and seen that these white land thieves have now died then I definitely celebrate it. I celebrate the death of our enemies, their children, their cats and their dogs. That is our position,” lui Maasdorp se boodskap op sosiale media.

Volgens dr. Dirk Hermann, bestuurshoof van Solidariteit, staan die vakbond saam met die ouers van Hoërskool Driehoek en het die vakbond ʼn mandaat van ouers gekry om Maasdorp oor dié uitsprake in die hof te pak.

Een van die ouers van die skool, Lucille Olivier, se seun was etlike meters van die ongeluk af en het emosioneel oor die trauma van die dag gepraat. “Hoewel ek as individu hier sit, is ek seker dat ek vandag namens alle ouers in Suid-Afrika praat. Ons staan saam geskok, sprakeloos, angstig en onseker. 1 Februarie se tragedie by my kind se skool het binne sekondes my aakligste nagmerrie ʼn realiteit gemaak,” het Olivier gesê.

Lucille Olivier. Foto: Reint Dykema

“Ek as ouer en Suid-Afrikaner is absoluut gewalg deur lede van die BLF en Lindsay Maasdorp se uitsprake van verlekkering en viering op sosiale media ná die nuus dat vier wit kinders in die ongeluk dood is,” het Olivier gesê.

Hermann het beklemtoon dat rassehaat deur randfigure nie net daar gelaat mag word nie, want wanneer dit net gelos word, word dit die norm. “Die regstelsel is ontwerp vir die uitsondering, nie die norm nie.

“Dit is juis vir mense soos Maasdorp ontwerp. Die regstelsel straf nou sodat die volgende onbekende slagoffer van die randfiguur beskerm word. Ons moet die volgende onskuldige slagoffers beskerm teen die pyn en trane weens die BLF se rassehaat,” het Hermann saamgevat.

Olivier het vandag by die mediakonferensie gesê daar is nie woorde om die seer van Maasdorp se uitsprake te beskryf nie. Volgens Olivier was die tragedie by die skool verseker nie rasgebonde nie en dat dit soos ʼn golf seer oor alle rasse gespoel het. “Wit en swart kinders het seergekry; wit en swart kinders het saam gehuil. Hulle almal is óns kinders en dit is ons almal se tragedie,” het Olivier gesê.

Volgens Hermann is Solidariteit se regsaksie drieledig. Die vakbond begin met ʼn klag van crimen injuria wat op die onwettige, opsetlike en ernstige benadeling van die menswaardigheid van ʼn ander persoon fokus. “In hierdie geval behels dit ook rasse-aanhitsing en nadelige aanmerkings wat op die betrokke slagoffers se ras betrekking het,” het Hermann gesê.

‘n Skermskoot van die uitlatings.

Tweedens gaan Solidariteit ʼn klag by die Gelykheidshof lê kragtens artikel 10 van die Gelykheidswet, wat fokus op die verbod op haatspraak. In die derde klag, wat by die Onafhanklike Verkiesingskommissie gelê gaan word, versoek Solidariteit dat die BLF as politieke party gederegistreer word. “Partye wat uitsprake maak wat op rassehaat gebaseer is, hoort nie in ʼn demokratiese verkiesing nie,” het Hermann gesê.

Volgens Werner Human, adjunkbestuurshoof by Solidariteit Regsdienste, is dit die vakbond se tweede klag teen die BLF. “Die BLF is ʼn party wat deur haat gedryf word. Hulle ideologie is haat en dit moet eenvoudig gestop word. Die BLF wil vanjaar aan die verkiesing deelneem, ondanks die feit dat geen wit persoon aan hul party mag behoort nie en ondanks die feit dat hulle boodskap een van haat is. Ons oproep aan die OVK is om die BLF dringend van die wedstryd te verwyder,” het Human gesê.

“As gemeenskap is ons harte saam met elke ouer wat ʼn kind verloor het of wie se kind beseer of getraumatiseerd is, stukkend. Ouers is nie veronderstel om hul kinders te verloor nie. Deur die trane kyk ons ook met dankbaarheid na ʼn gemeenskap wat mekaar omvou het. Duisende mense het mekaar vertroos en gebid.

“Vaaldriehoek en Suid-Afrika se trane het die afgelope ruk nie grense geken nie. Ons het mekaar omhels en vasgehou, sonder om enige onderskeid te tref. Hierdie vashou het oorgespoel na die hele land. Mense van oraloor het geskryf, blomme gestuur, geld geskenk en al die ouers en kinders wat soveel trauma beleef het in hul gebede opgedra. Daarvoor kan ons vir Suid-Afrika net sê baie, baie dankie,” het Olivier gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

67 Kommentare

jongste oudste gewildste
JH

Hier gaan absoluut niks van kom nie, die IEC het al 2keer gewaarsku, maar het nie die ruggraat om iets te doen nie.

Diefie

Trots op julle Solidariteit. Gee hulle gas. En ons Suid Afrikaners moet saam glo dat dit suksesvol sal wees.

Lizelda

Ek moet se ek het werklik baie vertroue in Solidariteit en dr Dirk Hermann, hy’s nie bang om d wat hulp teen hierdie tipe kaliber mense/boelies te verleen nie.

Johan H.

Weereens my innige simpatie, maar nadat ek vandag eskom se verbrokkeling gaan lees het,het ek geen hoop vir enige instelling in die land nie, kyk hoe sloer alles oor die korrupte leiers in die land. Sorrie!

RonelS

Sterkte! Hoop regtig die skuldiges sal aan die pen ry.