[Video] ‘Skietvoorval’ op plaas: Gemoedere loop hoog by hof

Die Brits-landdroshof. Foto: Landi Malan

Gemoedere het Vrydag hoog geloop by die Brits-landdroshof waar ʼn man verskyn het in verband met die beweerde skietery van drie mans op ʼn plaas in die Mooinooi-omgewing.

Matthew Benson (24), wat aangekla word van die moord op Tebogo Ndlovu van Majakaneng en poging tot moord op sy twee vriende, het weer in die hof verskyn waar hy om borgtog aansoek gedoen het. Die hofverrigtinge is egter vertraag nadat ʼn hewige rusie oor sitplek tussen die inwoners van Majakaneng en Benson se vriendin en ondersteuners ontstaan het.

Na wat verneem word het Benson se vriendin plek vir haar ma gehou wat uit die hof gegaan het. Toe ʼn ander vrou daar wou sit en sy aangesê is die plek word vir iemand uitgehou, het ʼn argument ontstaan.

Daar was ʼn oor en weer geskree in die hof en die hofbeampte het tevergeefs probeer om die situasie in bedwang te bring. Job Dliso, provinsiale sekretaris van Cosatu in Noordwes, kon uiteindelik daarin slaag om die gemoedere te kalmeer. Die polisie se taktiese reaksie-eenheid is na die hof ontbied om orde te handhaaf.

Die staat voer aan Benson het Ndlovu op 2 Augustus geskiet terwyl Ndlovu glo saam met twee ander mans skrootmetaal op die plaas gesteel het. Maroela Media het vroeër berig lt.kol. Isaac Tlhapi, die ondersoekbeampte in die saak, het Vrydag aan die hof gesê bloed wat op die toneel gevind is, het positief getoets toe dit met bloed van Ndlovu se ma vergelyk is. Hy het ook gesê patroondoppies wat op die toneel gevind is, stem ooreen met die vuurwapen waarop daar op die plaas beslag gelê is.

Die mense in die hof het woedend gereageer toe Jeff Moyo, Benson se regsverteenwoordiger, sy kliënt se verklaring voorgelees het waarin hy stel dat daar hase en ape op die plaas geskiet word en dat die patroondoppies daarom op die plaas gevind kon word.

Die mense het Moyo ook uitgejou toe hy aan Tlhapi gesê het hy hits geweld in Majakaneng aan. Moyo het dit gesê nadat Tlhapi aan die hof gesê het niemand sal op Benson se ouers se plaas woon totdat Ndlovu se liggaam gevind is nie.

Tlhapi het aan die hof gesê dat die inwoners van Majakaneng ʼn gewelddadige betoging begin het nadat Ndlovu vermis geraak het. Die inwoners het geëis dat sy liggaam gevind word. Minstens vyf voertuie is aan die brand gesteek en die N4, R104 tussen Pretoria en Rustenburg en die R566 tussen Pretoria en Sun City is tydens die betoging versper.

Tlhapi het gesê die polisie het 15 sake van opsetlike saakbeskadiging aanhangig gemaak wat met die Majakaneng-betoging verband hou.

Hy het die verdediging se stelling dat Ndlovu lewendig en gesond is betwis. “Ons het opgevolg op die bewering dat hy êrens gesien is en het gevind die mense wat beweer hulle het hom gesien, het eintlik na die twee oorlewendes [van die beweerde skietvoorval] verwys.”

Betogers buite die Brits-landdroshof waar Matthew Benson verskyn het. Foto: Molaole Montsho/ANA

Tlhapi het gesê ʼn boer wat hy net as mnr. Lawrance geïdentifiseer het, het aan hom gesê Benson het hom gebel om te kom help omdat daar misdadigers op die plaas was. Toe hy op die plaas aankom, het hy na bewering vir Benson in besit van ʼn 9 mm-pistool gevind. Hy het ook gesê twee van Lawrance se werknemers het aan die polisie gesê hulle het skote gehoor wat van Benson se plaas af gekom het.

Hy het gesê Lawrance is ʼn sleutelgetuie en indien hy nie ʼn bejaarde man was nie, kon hy om veiligheidsredes in ʼn getuiebeskermingsprogram geplaas word. “Ek het belowe om alles wat ek weet aan die hof bekend te maak, daarom het ek nie die inligting wat ek by Lawrance gekry het weggesteek nie,” het hy gesê.

Tlhapi het aangevoer Benson kan met die ondersoek inmeng omdat hy weet Lawrance sal ʼn getuie wees.

Benson se borgtogaansoek sal op 27 September hervat. Die staat staan sy aansoek teen en hou vol dat hulle ʼn sterk saak teen Benson het, terwyl die verdediging sê die staat se saak is swak.

As die video nie speel nie, kyk dit hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
Skybird

Kyk nou net, mooi geleer by die parliament se barbaarse optrede, stilswye is ook ń antwoord.

Anita Wandrag

Eskom het die Nylstroom Munisipaliteit tot 26 Sept gegee om hul agterstallige krag rekening te betaal, die Munisipaliteit het pas R4 miljoen betaal
Ek skryf hier names al die “prepaid” kragmeter inwoners – Het ons geen regte nie? Ons moes “disconnection fees” betaal toe ons “prepaid” meters gekry het, ons koop VOORUIT ons krag, waar is ons geld? Nylstroom Munisipaliteit moet ons antwoord…. En dadelik asb!!!
Dit is ongetwyfeld diefstal en skending van my grondwetlike regte!!!

De Villiers

Ek wonder hoeveel van hierdie betogers was al by een van die duisende hofsake waar onskuldige boere en/of hul vroue en kinders wreedaardig vermoor is, ter ondersteuning dat plaasmoorde moet stop?

Frikkie (Nie pienk)

Dit wil al voorkom of Matthew Benson ‘n Ramaphosa-padda kan wees.

HPV

Hierdie aanhitsing tot opstandige optrede word slegs as verskoning gebruik om te plunder, vernietig en te steel. Aanloop tot ‘n tweede Rwanda! Wetsgehoorsame mense moet hulself begin mobiliseer om hulself te verdedig.