Vliegtuig voorgekeer om man in hegtenis te neem

Argieffoto

ʼn Vliegtuig wat Woensdag op pad was om by die OR Tambo Internasionale Lughawe op te styg, moes op die nippertjie omdraai en na sy parkeerplek terugkeer sodat ʼn man wat aan boord was in hegtenis geneem kon word.

Brig. Vishnu Naidoo, woordvoerder van die polisie, het gesê twee speurders van die SAPD het lugvaartveiligheidspersoneel omstreeks 15:00 ingelig dat ʼn man wat van voertuigdiefstal verdink word aan boord die vliegtuig op pad na Harare was. Die verdagte word al sedert 2014 deur die polisie gesoek nadat hy na bewering ʼn voertuig gehuur en dit nooit terugbesorg het nie.

“Die lugvaartveiligheidspersoneel het die lugredery deur die lughawebestuursentrum gekontak en in kennis gestel. Die vliegtuig het daarna teruggekeer na sy parkeerplek nadat die betrokke protokol gevolg is,” het Naidoo gesê.

Polisiebeamptes en lugvaartveiligheidspersoneel het aan boord die vlug gegaan en die man in hegtenis geneem.

Naidoo het gesê die inhegtenisneming vorm deel van die polisie se nuwe hersiene ingrypingstrategie rondom veiligheid by die lughawe. Die SAPD, Ekurhuleni-metropolisie, ander wetstoepassingsagentskappe, die lughawebestuur van OR Tambo en regeringsdepartemente het kragte saamgespan om die hoë aantal misdaadvoorvalle in en rondom die lughawe hok te slaan.

“Om seker te maak daar is geen hindernisse met betrekking tot die samewerking tussen ons nie, is ʼn belangrike element van die strategie, en hierdie voorval is ʼn bewys daarvan dat ons nou beter op kriminele bedreigings kan reageer,” het Naidoo gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
Lou

Dit sou ‘n lekker storie gewees het as die polisie op die aanloopbaan opgejaag het en die vliegtuig voorgekeer het soos in die moewies.

jaco

gesteel in 2014 en dit vat meer as 3 jaar om op te spoor. is daar nie tracker op alle gehuurde motors nie?

Carel

Jaco, die man het nie 3 jaar lank in die voertuig gebly nie.

Lientjie

Daai voertuig is 3 jaar terug dieselfde dag al oor die grens! Lyk my die ou pendel tussen SA en Harare.

chris

Hy kon al by die check in point gearristeer gewees het, ons sisteem is nog steeds te wankelrig en onbetroubaar. Daai ou het al intussen honderde voertuie oor die grens en vlieg heen en weer van 2014…