Voëlklip-tragedie: Ondersoek in ‘sensitiewe stadium’

Ettienne Scheepers, sy vrou, Heidi, en hul kinders.

Die polisie se ondersoek na die dood van Heidi Scheepers (35) en haar twee jong kinders nadat hul voertuig verlede jaar in die see by Voëlklip naby Heroldsbaai beland het, is “in ’n sensitiewe stadium”.

Só het kapt. Malcolm Pojie, woordvoerder van die polisie, Dinsdag by navraag aan Maroela Media bevestig.

Scheepers en haar tweejarige seuntjie, Hugo, het volgens die nadoodse ondersoeke verdrink toe hul voertuig in Oktober in die see beland het. Die sesjarige Cozette se liggaam is nooit gevind nie.

Pojie het vanoggend verduidelik dat die ondersoek na Scheepers en die kinders se dood in dié stadium nog nie afgehandel is nie. Die ondersoek sal sodra dit afgehandel is na die direktoraat vir openbare vervolging verwys word wat op sy beurt sal besluit of iemand vervolg sal word of nie.

Die grootskaalse soektog na Heidi Scheepers en haar twee kinders is verlede jaar van stapel gestuur. (Foto: SA Polisie)

“Niemand is nog in verband met die voorval in hegtenis geneem nie.”

Maroela Media het vroeër berig ʼn uitgebreide soektog is verlede jaar van stapel gestuur nadat Scheepers en haar kinders die betrokke dag in Oktober omstreeks 18:00 die laaste keer lewend in Heroldsbaai gesien is. Hulle het verby die gesin se winkel, die Heroldsbaai Kafee, gery.

Haar man, Ettienne, het sy gesin kort daarna as vermis aangemeld.

ʼn Grys Volkswagen Caravelle, soortgelyk aan die een waarmee Scheepers en haar twee kinders verdwyn het, is enkele dae later langs die rotse by Voëlklip gekry waarna Hugo se liggaam kort daarna in die see gevind is.

Heidi se liggaam is ’n paar dae later in die see by Heroldsbaai gevind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

7 Kommentare

jongste oudste gewildste
Maryna

Ja nee, hierdie is ‘n snaakse storie. Ek hoop regtig dat wie ook al die skuldige is sommer vinnig vasgetrek word!

Nella

As iemand skuldig is, mag hy /sy vir hom/haar kry. Vir my is dit nie ‘n gewone selfmoord nie. Daar moet ‘n storie agter die storie wees.

Herman

Skynbaar is die man en sy prokureur baie sensitief oor suggesties van wie vir die beweerde moorde beskuldig kan word. Klink my nie die polisie het nou juis honderde verdagtes om te ondersoek nie.

Sarel

Ten mi ste gasn die ondersoek voort,maar wanneer dit so lank duur twyfek mens. Sterkte vir familie.

Madels

Ek hoop regtig dat dit nie dis Ettienne nie. Hoe verskriklik sal dit nie wees nie :-(