Vrou ‘het naels af baklei’ teen plaasaanvallers

WAARSKUWING: Die foto’s in die berig is grafies van aard en kan sensitiewe lesers ontstel.

Die woorde “Dubula iBhunu”, “Viva Juju” en “Viva EFF” is met rooi verf op die egpaar se voordeur aangebring. Foto: Verskaf

“Hulle is geweldig, geweldig getraumatiseer. Ek kan dit nie vir jou beskryf nie. Desireé praat en huil en alles deurmekaar. Hulle het haar verskriklik verniel.”

Só vertel Anton Burger, ʼn patrollielid van die plaaslike buurtwag in die Halfmanshof-omgewing buite Porterville in die Wes-Kaap. Burger was Sondagaand op die toneel waar Tobie (50) en Desireé van Schalkwyk (45) op hul plaas, De Tuin, aangeval is.

Burger vertel dat Tobie en Desireé op die plaas woon waar hy finansiële werk vir die plaaseienaars verrig. Tobie is semi-paraplegies en kan klein entjies met ʼn kierie loop, maar gebruik ʼn rolstoel by die huis en in die kantoor.

Hy het Sondagaand ʼn lêer in die kantoor gaan haal en net na 21:00 weer met sy motor aan die agterkant van die huis stilgehou waar hy naby die deur van die opwaskamer is om die huis binne te gaan. Volgens Burger het Tobie net die opwaskamer binnegekom toe hy deur drie aanvallers met klapmusse oorval is.

“Die erf is reg rondom geëlektrifiseer, so hulle moes op ʼn manier toegang gekry en agter die muurtjie of digte plantegroei geskuil het toe Tobie die huis binnegaan,” sê Burger.

Desireé van Schalkwyk se lyf is vol kneusplekke soos sy aangerand is. Foto: Verskaf

Die aanvallers het Tobie hardhandig op die grond neergegooi, geskop en geslaan voordat hulle ʼn tweeliter-koeldrankbottel vol petrol oor hom uitgegooi het. “Tobie-hulle het nêrens petrol naby die huis nie, so hulle moes die petrol saam met hulle gebring het. Hy was deurtrek met petrol. Van sy kop tot sy tone was nat van die petrol.”

Op daardie oomblik het Desireé kom ondersoek instel na die rumoer en die aanvallers het haar ook gegryp.

“Hulle het vir Desireé gepak en haar kop vasgedruk. Sy het my later self vertel dat een van die aanvallers so bo-oor haar gaan sit het en sy knieë gebruik het om haar arms vas te druk terwyl hy probeer het om haar bene oop te dwing,” sê Burger.

“Hulle het vir Tobie gesê: ‘Nou gaan jy kyk hoe ons hierdie wit b***h verkrag’. Desireé is ʼn gawe, saggeaarde vrou. Sy het nog nooit enigiemand skade aangedoen nie. Ek kan nie dink hoekom hulle so iets sal sê nie.”

Tobie van Schalkwyk se bebloede gesig nadat hy aangerand is. Foto: Verskaf

Volgens Burger het Desireé egter met alles in haar terugbaklei. “Sy het letterlik haar naels af baklei.”

Tobie kon daarin slaag om sy motor se afstandbeheer te druk en die voertuig het ʼn piep-geluid gemaak en die ligte het geflits. Dit het die aanvallers vermoedelik laat dink dat iemand buite die huis stilgehou het en hulle het vinnig laat spaander.

Die egpaar kon daarna hulp ontbied en is na ʼn hospitaal gehaas.

“Jy kan net vir jouself dink wat sou gebeur het as hy nié daardie knoppie gedruk het nie. Hulle sou haar verkrag het en daarna die vuurhoutjie vir Tobie getrek het,” sê Burger.

Hy sê daar was ná die aanval talle polisiebeamptes, beamptes van die forensiese eenheid, private veiligheidsbeamptes en snuffelhonde op die toneel.

Maroela Media het vroeër berig Desireé en Tobie het in vrees gelewe sedert hulle op 14 Oktober wakker geword het met die woorde “Dubula iBhunu”, “Viva Juju” en “Viva EFF” met rooi verf op hul voordeur aangebring. “Dubula iBhunu” is die omstrede struggle-lied bekend as “Kill the boer” wat spruit uit die apartheidsera.

Kapt. FC van Wyk, woordvoerder van die polisie, sê niemand is nog in verband met die voorval in hegtenis geneem nie. Sake van poging tot moord en seksuele aanranding word ondersoek.

Die Van Schalkwyk-egpaar woon nie tans op die plaas nie uit vrees vir hul veiligheid.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

60 Kommentare

jongste oudste gewildste
Anoniem

Nou ja, wat kan mens sê om hierdie mense veilig en beter te laat voel??? Niks en niemand gaan veilig voel en wees in hierdie land voordat Malema nie agter tralies sit en die Government nie bykom nie!!! Dit gaan nie ophou nie!!

Donderstorm

Maar die lied kill the boer kill the farmer is kwansys net n ou struggle lied hul kan se en doen wat jul wil maar dit is mos niks hul kom niks oor nie maar laat iemand iets uit kwaadheid se dan is dit die grootste sonde in die heelal

Ron

Elektriese heinings help niks meer nie , ook nie diefwerings of veiligheids hekke nie
Honde is geen afskrikmiddel nie . . .
Ons moet dink aan beter , ander en nuwe idees!

Dienkie

Daar is nou die bewys. Die EFF sit agter al die moorde/aanvalle op plaasboere en hulle families.

Willem

Hoe wreed aardig om petrol oor n mens te gooi en te wil brand en die arme vrou hoe voel sy n mens raak bos as jy sulke dinge lees nou vra ek hoe lank gaan dit nog so aan hou die moorde op die plase en as jy vreemde woorde se dan dan wag die tronk vir jou hulle het gehoor van rassisme maar weet nie waar hang die bel nie toe ons jonger was was daar nie sulke nonsens nie ook nie eers in die weermag nie nou vra n mens hoe lank gàan dit nog so aangaan… Lees meer »