Die voormalige ANC-LP en staatskapingfluitjieblaser Vytjie Mentor is ná ʼn lang siekbed dood.
Die 58-jarige Mentor was sedert 2020, met ActionSA se totstandkoming, ʼn lid van dié party. Herman Mashaba, president van ActionSA, het Dinsdagoggend gesê Mentor is reeds geruime tyd siek en was maande lank in die hospitaal.
“Ons moenie vergeet dat Vytjie Mentor die eerste was om wat ons ‘staatskaping’ noem aan die groot klok te hang nie,” sê Mashaba.
Mentor was van 2002 tot 2014 ʼn parlementslid voor sy by ActionSA in die Wes-Kaap aangesluit het. Sy het weens gesondheidsprobleme in Junie vanjaar die tuig neergelê as die party se voorsitter in die provinsie.
Volgens die party het sy ʼn sentrale rol gespeel in die stigting en uitbreiding van die party in die Wes-Kaap.
Sy was een van die eerste politici wat voor die Zondo-kommissie na staatskaping getuig het en het onder andere aangevoer dat die Gupta-familie haar ʼn kabinetspos aangebied het.
“Sy was ʼn ware patriot wat haar land gedien het, selfs te midde van kritiek,” sê Mashaba.
“Ons hou Vytjie se familie en vriende in ons gedagtes en gebede en vra dat haar geliefdes die privaatheid gegun word om te rou.”
Michael Beaumont, nasionale voorsitter van ActionSA, het Mentor as een van Suid-Afrika se grootste stryders bestempel.
In huldeblyke op sosiale media is Mentor geloof vir die rol wat sy gespeel het om die omvang van staatskaping te help onthul.
Rus sag Vytjie….
Ek salueer jou Vytjie, rus in vrede en dankie dat jy die regte ding gedoen het.
Vytjie, jy sal onthou word vir die moed wat jy gehad om korrupsie bloot te lê. Rus in vrede
Rus in vrede Ma Vytjie, ons land het meer mense soos jy nodig om dié land reg te ruk.
Sy verdien n staats begrafnis.
Defnitief.
Verraai deur haar eie maar a held vir SA. RIP
En nou sal sy nooit sien dat haar onthulling die moeite werd was nie…….RIV
‘n Groot gees….. RIV Vytjie.
RIV. Jy was ‘n heldin en het nie geskroom om die waarheid te praat nie.