Woede oor ‘voorstel’ dat sigaretverbod tot op vlak 1 voortduur

sigarette

(Foto: pixabay)

Die Fair Trade Independent Tobacco Association (Fita SA) sê hy het begrip vir die woede van talle mense ná berigte dat die verbod op die verkoop van sigarette op vlak 3 van die afsonderingsregulasies voortgesit gaan word.

Luidens berigte het die minister van samewerkende regering en tradisionele sake, Nkosazana Dlamini-Zuma, dié voorstel aan die nasionale koronavirus-bevelsraad gemaak en gesê sy glo dit gaan ʼn té groot gesondheidsrisiko wees om die verkoop van sigarette en alkohol ná 1 Junie toe te laat.

Suid-Afrika, wat tans op vlak 4 van die afsonderingsregulasies is, skuif na verwagting teen die einde van die maand aan na vlak 3. Die verwagting is groot dat die verkoop van alkohol en sigarette dan weer toegelaat sal word.

“Ons verstaan dat die kwessie nou voor die nasionale koronavirus-bevelsraad dien waar dit bespreek word. Daar is egter nog geen besluit oor die verbod op die verkoop van sigarette geneem nie, met talle lede van die bevelsraad wat glo ook ten gunste van die ophef van die verbod is,” het Sinenhlanhla Mnguni, voorsitter van Fita SA, gesê.

Fita SA het op 4 Mei  ʼn hofaansoek gebring om die regering te dwing om die verbod op die verkoop van sigarette op te hef. Hy vra ook die hof om die regering te dwing om hom van redes te voorsien waarom die verbod op die verkoop van sigarette tydens vlak 4 van die afsonderingstydperk voortduur.

Mnguni sê nou die regering moet teen Dinsdag die rekord van sy besluite en die redes vir die verbod – indien daar enige redes is – vir afkondiging van die regulasies voorsien. Fita SA sal daarna sy beantwoordende verklaring indien en die saak behoort kort daarna aangehoor te word.

Die organisasie Tax Justice SA (TJSA) het intussen gewaarsku die verbod op die verkoop van sigarette is besig om ʼn misdaad-epidemie te veroorsaak en die reeds sukkelende ekonomie te verswelg.

“In sy pogings om ʼn gesondheidspandemie te bekamp het die regering ʼn onverdedigbare verbod afgekondig wat nou ʼn nasionale misdaadepidemie tot gevolg het,” het Yusuf Abramjee, stigter van TJSA, gesê.

(Foto: SA Polisie)

“Onwettige handel floreer terwyl die verbod misdadigers verryk wat desperate rokers uitbuit en sukkelende gesinne verarm wat gedwing word om hemelhoë pryse te betaal. Die staatskoffers wat reeds R35 miljoen per dag aan belasting verloor word ook verder geplunder.”

Abramjee sê volgens ekonome en wetenskaplikes dra die verbod glad nie by tot die bekamping van Covid-19 nie. “Pleks daarvan dwing dit Suid-Afrika se 11 miljoen rokers om die wet te oortree, terwyl selfs skoolkinders nou in onwettige handelaars verander word.”

Volgens Abramjee het navorsers aan die Universiteit van Kaapstad bevind meer as 90% rokers het tydens die afsonderingstydperk onwettig sigarette gekoop. Die verbod versterk ook misdaadnetwerke wat moeilik ná die krisis gestuit gaan word.

Volgens prof. Glenda Gray, ʼn lid van die ministeriële advieskomitee en voorsitter van die Suid-Afrikaanse mediese navorsingsraad, gaan die verbod nie mense keer om te rook nie, dit gaan eerder beteken dat buitensporige swartmarkpryse gaan lei tot “minder kos op kinders se borde”.

Abramjee sê kenners is gekant teen die verbod en die regering het reeds ʼn petisie met meer as ʼn halfmiljoen handtekeninge ontvang waarin hy gevra word om die verbod op te hef. Twee miljoen informele handelaars het ook ʼn voorlegging aan die regering gedoen waarin hulle die ministers daarvan beskuldig dat hulle van hul inkomste ontneem word en geld na misdadigers laat sypel.

Abramjee sê die voorleggings kom van veel meer mense as die 2 000 boodskappe ten gunste van die verbod wat Dlamini-Zuma as rede daarvoor voorgehou het.

Hy sê net misdadigers baat in dié stadium by die verbod.

“TJSA doen ʼn beroep op die president om ʼn aankondiging te doen dat die verbod opgehef sal word wanneer die land na vlak 3 beweeg.”

Abramjee sê dit lyk of drankwinkels op vlak 3 sal mag heropen, wat die onwettige handel in drank gaan help verminder en broodnodige belasting gaan help invorder.

“Drankwinkels en ander handelaars gaan egter goeie stelsels gereed moet hê omdat vrese dat die verkope dalk net tydelik toegelaat kan word, tot ʼn toeloop kan lei.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
katerinadiekat

Ag nee regtig!!!! Its time to go The Hague with this matter. This is a severe human rights violation!!!!!!

Willem

Sy ken die klomp in die Wes Kaap sleg hulle sal alles oopmaak vir haar

Alida

CR het die laaste se. Daai vrou kan nie die hele land regeer nie. Skending van menseregte. Sy rook en drink self vir al wat mens weet.

Boortor

As hierdie land brand gaan dit haar skuld wees. En hy gaan brand soos hulle nou aangaan.

Jan

Wat daai klomp probeer doen is nou belaglik. Waar hulle gewoontlik 2 mense op n zol rook rook daar nou 5 op n zol.