Zuma reageer op hofuitspraak

Pres. Jacob Zuma (Foto: GCIS)

Die presidensie het gesê die appèlhof in Bloemfontein se uitspraak in die sogenaamde spioenasiebande-saak is teleurstellend maar lank verwag.

Die appèlhof het pres. Jacob Zuma en die Nasionale Vervolgingsgesag (NVG) se aansoeke om verlof tot appèl met koste van die hand gewys.

Zuma en die NVG het die appèlhof genader nadat die hooggeregshof in Pretoria verlede jaar beslis het dat die besluit om Zuma nie te vervolg nie irrasioneel was en dat die 783 strafregtelike aanklagte teen die president weer ingestel moet word.

Dr. Gongani Ngqulunga, pres. Jacob Zuma se woordvoerder, het gesê die effek van die appèlhof se besluit is dat om Zuma te vervolg die enigste wettige besluit is wat die NVG geneem het. “Dit beteken dat die voorleggings nie oorweeg is nie en die verwagting is dat die nasionale direkteur van openbare vervolging nou hierdie voorleggings sal oorweeg onder die korrekte wetlike voorskrifte en ʼn wettige besluit daaroor sal neem.”

Ngqulunga het gesê enigiemand het die reg om die tipe voorlegging te maak en te verwag dat ʼn wettige besluit geneem sal word.

Zuma en die NVG het die appèlhof genader nadat die hooggeregshof in Pretoria verlede jaar beslis het dat die besluit om Zuma nie te vervolg nie irrasioneel was en dat die 783 strafregtelike aanklagte teen die president weer ingestel moet word.

Die appèlhof se uitspraak kom nadat Zuma se regspan verlede maand in dié hof toegegee het dat die besluit om Zuma nie op 783 aanklagte van onder meer korrupsie te vervolg nie, irrasioneel was.

Mokotedi Mpshe, destydse hoof van die NVG, het in 2009 besluit om Zuma, toe net ANC-president, nie te vervolg op aanklagte van korrupsie, rampokkery, geldwassery en bedrog nie. Zuma was ten tyde hiervan in ʼn magstryd met die voormalige president, Thabo Mbeki, gewikkel.

Mpshe het die saak laat vaar nadat hy na die bandopnames, gesprekke tussen Bulelani Ngcuka, Mpshe se voorganger, en Leonard McCarthy, hoof van die Skerpioene, geluister het. Mpshe was glo van mening dat McCarthy die proses vir verskuilde doeleindes gebruik het, naamlik ʼn politieke komplot om glo te verhoed dat Zuma president word.

Die DA het aangevoer Mpshe se besluit was irrasioneel, onredelik en geneem met ʼn verskuilde politieke agenda en hulle het hulle tot die hof gewend om die besluit te laat omkeer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
AP

Kry hom nou agter tralies almal het lank genoeg gewag

zoom zoom

Abrahams gaan hom nie self van die soustrein afgooi nie. Die ding gaan nog lank gerek word.

Eish

Daar begin die rieldans.
” … voorlleggings is nie oorweeg nie…”
Die reëlmaat waar teen onbekwame persone aangestel word, laat die gedagte ontstaan dat dit juis gedoen word te wille van die skep van skuiwergate vir later gebruik.
Agt jaar lank reeds en geregtigheid het steeds nie geseëvier nie.
So is ons getransformeer van atleties na invalied.

Penellope Jones

Op een of ander manier sal hy hieruit ook wegkom.

al

Zuma moet ons belastinggeld teruggee vir die sloer van die hofsaak. Die hofsaak het blykbaar R30 miljoen rand uit ons publiek se sak gejaag.