Prinses Beatrice, oudste dogter van prins Andrew en Sarah Ferguson, die hertogin van York, het Saterdag aan ʼn dogtertjie geboorte geskenk.
Die Britse koningshuis het pas dié babanuus aangekondig.
Dit is Beatrice (33) en haar man, die eiendomsmagnaat Edoardo Mapelli Mozzi (36), se eersteling.
“Haar koninklike hoogheid, prinses Beatrice, en mnr. Edoardo Mapelli Mozzi, is verheug om aan te kondig dat hul dogter op Saterdag 18 September 2021 om 23:42 in die Chelsea en Westminster-hospitaal in Londen gebore is,” lui die koninklike aankondiging.
Die baba weeg sowat 2,8 kg. Haar naam is nie bekend gemaak nie.
“Die nuwe baba se grootouers en oorgrootouers is almal in kennis gestel en is verheug oor die nuus. Die familie wil graag die hospitaalpersoneel bedank vir hul wonderlike sorg.”
Volgens die aankondiging sien die egpaar uit daarna om hulle dogter voor te stel aan haar boetie, Christopher Woolf (5), uit Mapelli Mozzi se vorige verhouding met Dara Huang.
Prinses Beatrice en Mapelli Mozzi is in Julie verlede jaar in die All Saints-kapel in Windsor getroud.
Prinses Beatrice se jonger suster, prinses Eugenie (31), het in Februarie vanjaar die lewe geskenk aan ʼn seun, August. Sy is getroud met die sakeman Jack Brooksbank.
Sy trek darem vreeslik baie na haar ma!!! Pragtig en baie geluk met die kleine babatjie
Nog goeie brokkie nuus van die Britse koningsgesin . Nog ‘n kleinkind vir Andrew en Fergie . Hoop net nie Meghan Markle lees dit nie. Dan gaan sy dringend werk maak daarvan om weer in die kalklig te wees , iets waarna sy heeltyd smag.