Een persoon is dood en vier gewond toe ʼn man Dinsdag in ʼn kliniek in die Amerikaanse deelstaat Minnesota op gesondheidswerkers losgebrand het. Die man was glo ongelukkig met die behandeling wat hy by dié kliniek ontvang het.
Gregory Ulrich (67) het glo kort voor 11:00 by die Allina Health Clinic in Buffalo, ’n stad noordwes van Minneapolis, ingestap en begin skiet. Daar was ook moontlik ’n ontploffing voordat skote in die kliniek geklap het.
Vyf mense is ná die voorval na ’n hospitaal gehaas, waarna dit later bekend geword het dat een van die slagoffers dood is.
Pat Budke, polisiehoof van Buffalo, het tydens ’n mediakonferensie gesê Ulrich het ʼn wrok teen die betrokke mediese fasiliteit gehad.
“Dit is ʼn storie wat oor ʼn paar jaar strek, en daar is beslis ʼn geskiedenis dat hy ongelukkig was met… die gesondheidsorg wat hy ontvang het.”
Volgens Budke was daar egter nooit enige aanduiding “dat ons in die situasie sou verkeer waarin ons vandag is nie.”
Die koerant Star Tribune berig Ulrich het ná die skietery by die kliniek gesê daar is bomme op die perseel geplant voordat hy in hegtenis geneem is. Die polisie het later bevestig dat hulle op ʼn verdagte pakkie afgekom het toe hulle die gebou deursoek het. Ander toestelle is in ʼn nabygeleë hotelkamer gevind waar die verdagte gebly het.
ʼn Ooggetuie het aan Fox 9 vertel sy het haar ma by die kliniek gaan aflaai toe twee verpleegsters uitgehardloop kom.
“Hulle het gesê hulle het binne ʼn minuut 11 skote gehoor. Hulle was baie bang en wou net uit die plek kom.
“Ons het sowat twee minute later gesien hoe die [glas van die] voorste vensters breek… en ons het daar weggekom.”
Die verdagte is tans in aanhouding.
Nou was dit nou die drama werd
67 en jy bou bomme en beplan om onskuldige mense dood te maak… skokkend.