Navo het ‘geen plan’ om magte na Oekraïne te stuur

Navo se hoof, Jens Stoltenberg, tydens die konferensie wat Donderdag oor die geweld in Oekraïne gehou is. (Foto: AFP / John Thys)

Jens Stoltenberg, sekretaris-generaal van die Noord-Atlantiese Verdragorganisasie (Navo), sê die organisasie het “geen plan” om magte na Oekraïne te stuur nie.

Navo het vroeër ’n beroep op Rusland gedoen om sy troepe te onttrek en aangedui dat hy reeds sy grond-, see‑ en lugmagte aan die oostelike kant van die alliansiegebied versterk het.

Die organisasie het bevestig dat hy in die komende dae nog soldate na dié gebied sal stuur.

Stoltenberg het Donderdag tydens ʼn mediakonferensie gesê dat daar egter geen Navo-troepe in Oekraïne is nie.

Rusland het dié land Donderdag met geweld ingeval.

Stoltenberg het tydens die konferensie gesê dat Navo se verdedigingsplanne Donderdag geaktiveer is, maar dat die organisasie ’n konflik en aanval teen enige Navo-geallieerde land wil voorkom.

“Ons het dit duidelik gemaak dat ons nie enige planne het om Navo-troepe na Oekraïne te ontplooi nie. Ons het wel beklemtoon dat die teenwoordigheid van Navo-troepe in die oostelike deel van die alliansiegebied verhoog is. “Oekraïne is ’n hoogs gewaardeerde vennoot. Ons ondersteun Oekraïne al vir baie, baie jare. Ons het hulle gehelp om ’n meer moderne, bekwame gewapende mag te bou. Militêr het ons hulle met opleiding gehelp en om hul gewapende magte te versterk. Ons het hulle ook op verskillende maniere met kuberverdediging gehelp. Ons het egter nie Navo-troepe in Oekraïne nie,” het Stoltenberg benadruk. Navo sê hy is daar om alle Navo-bondgenote te verdedig en demonstreer sy toewyding deur sy verhoogde teenwoordigheid. Stoltenberg het voorts gesê dat Rusland se inval geen verrassing was nie.

’n Beskadigde gebou in Koshytsastraat in Oekraïne se hoofstad, Kiev. (Foto: AFP)

“Ons het maande lank hierteen gewaarsku en ongelukkig was dit iets wat geallieerde veiligheid- en intelligensiedienste lankal voorspel het. Ons het probeer om dit te voorkom deur Rusland te versoek om by diplomatieke pogings betrokke te raak en te waarsku dat die prys van ekonomiese sankies groot sal wees indien hulle Oekraïne binneval.”

‘Niemand wat saam met ons veg’

 Die ontploffings in Kiëf, Oekraïne se hoofstad, het Vrydag voortgeduur. AFP berig dat minstens 100 000 mense ontwortel is terwyl tientalle mense dood is.

“Die laaste keer dat ons hoofstad so iets ervaar het, was in 1941 toe dit deur Nazi-Duitsland aangeval is. Oekraïne het daardie euwel verslaan en sal hierdie een verslaan,” het pres. Wolodimir Zelenski Donderdag gesê toe hy dienspligtiges en reserviste landwyd opgeroep het om te veg.

Zelenski sê daar is nou ’n “nuwe ystergordyn” tussen Rusland en die res van die wêreld, soos tydens die Koue Oorlog. Hy het ook gesê dat sy “nasie alleen gelaat is”.

“Wie is gereed om saam met ons te veg? Ek sien niemand nie.”

Die Amerikaanse president, Joe Biden, het reeds aangedui dat die land geen magte na Oekraïne gaan ontplooi nie. Die VSA en sy bondgenote het wel sanksies teen Rusland ingestel.

Brittanje het vroeër vandeesweek dieselfde gedoen, ʼn stap wat volgens premier Boris Johnson Rusland se ekonomie “vir die komende jare” sal knou.

Bronne: Navo, AFP

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
casper

Te bang en slapgattig — Kyk maar eerder hoe mense vermoor word en se hoe sad dit is !!

Witbaard

Navo beteken net soveel soos die WGO. Dis n klomp mense wat deur die wereld gefinansier word om geraas te maak. Maar as die bom bars, tree hulle nie op om hulle lede te beskerm nie.

Faraway

In n tyd waar almal vrede vrede skree . . . het mense se liefde verkoel

Dries

Sankies sal werk in die lang termyn maar die oplossing nou is om Ukraine te help om die oorlog te voer en die Russe te verslaan

Anoniem

Waar is die “supermoontheid” grootbek VSA en NAVO wat die indirekte oorsaak hiervan is dan nou? Die slenter van die VSA om Oekraine nader aan die Weste te bring het Putin duidelik vertoorn en met reg so, Niemand sal vol lag wees indien ‘n eertydse bondgenoot en buurstaat ewe skielik sy rug op jou draai en volksvreemde magte op jou voorstoep parkeer nie. Oos Europese politiek verskil hemelsbreed van Wes Europese politiek.