Rook hang in die lug in Montreal (Foto: Andrej Ivanov/AFP)
Myn- en bosbou-operasies word erg in die Quebec-provinsie in Kanada ontwrig, met 160 veldbrande wat sedert Dinsdag in dié provinsie woed.
Boonop het dié brande moontlik weens nalatigheid ontstaan.
Die Abitibi-Temiscamingue-streek van die provinsie, meer as 650 km noord van Montreal, word die ergste deur die brande geraak.
Francois Bonnardel, die minister van openbare veiligheid in Quebec, sê groot veldbrande van só ʼn verwoestende aard is ʼn ongewone verskynsel in die provinsie.
“Die westelike dele van die land gaan gewoonlik gebuk onder groot veldbrande. Nou is die hele Quebec omtrent in vlamme,” sê Bonnardel.
I wonder how the fires started in Alberta and Nova Scotia, Canada. pic.twitter.com/YThMmNZPwD
— david (@1776primed) June 3, 2023
Inwoners het die reën wat Dinsdagmiddag in dele van die provinsie begin uitsak het, verwelkom. Gevolglik kon sowat 4 400 inwoners wat die gebied moes verlaat, weer na hul huise in die noordelike stad Sept-Iles, aan die oewer van die St. Lawrence-rivier, terugkeer.
“Die veldbrande in die verre noorde van die provinsie sal egter weke neem om heeltemal in bedwang gebring te word.”
Quebec het altesame 424 veldbrande sedert die begin van die lente aangeteken; dit is meer as dubbel die gemiddelde jaarlikse getal veldbrande oor die afgelope dekade.
Rook en roet
Canada: wild fires raging in Nova Scotia pic.twitter.com/LPDewnhVkK
— Dr. Kirkland (@pokerintheback) May 29, 2023
Nadat groot veldbrande in die weste van die land in Mei opgevlam het, verál in die Alberta- en Saskatchewan-provinsie, het brandbestryding die afgelope paar weke na Nova Scotia, aan die Atlantiese kus verskuif, voordat brandbestrydingspanne na Quebec gestuur is.
Tientalle brande woed steeds in die weste van die land, waaronder 62 in Alberta, 76 in die mees westelike Brits-Columbië en 24 in Saskatchewan.
Sowat 100 brandbestryders van Frankryk sou teen Vrydag aanmeld om te help om die Quebec-veldbrande te bestry. Hulle sal werk saam met sowat ʼn duisend brandbestryders van Australië, Mexiko, Nieu-Seeland, Suid-Afrika en die Verenigde State wat ook hand bysit met brandbestrydingspogings.
Die Kanadese hoofstad Ottawa was Dinsdag in ʼn rookwolk gehul en die lug bokant Montreal en Toronto was donker. Die owerhede het inwoners gevra om buitemuurse aktiwiteite te beperk en gesê die rook sal waarskynlik vir nog ʼn paar dae in die lug hang.
Inwoners kla ook dat roet oral in hul huise en op hul meubels neergesak het.
Volgens Abe Bourgi, inwoner van Ottawa, het hy wakker geword met ʼn gelerige waas wat oor die stad hang. Hy vertel die son het ook ʼn diep oranje kleur gehad.
“Die reuk van rook is baie sterk,” het hy vertel.
“Baie mense dra maskers op straat en jy moet die deure en vensters toemaak anders ruik jou woonstel soos ʼn asbak.”
Brandbedtryders van Suid Afrika. Laas keer het hulle gestaak vir meer geld in Kanada. Kan nie glo hulle is alweer daar nie.
Omdat hulle uitgebyt was. Hulle het $50 per dag verdien terwyl Kanadese brandbestryders $25 per UUR verdien het. Ek sou ook staak!