Talle sterf in VSA-koue

Die bibberkoue wat die oostelike dele van die VSA getref het, en daartoe gelei het dat ses deelstate noodtoestande afgekondig het, was toe nie die ergste koue in menseheugenis soos aanvanklik voorspel is nie.

Trouens, die Amerikaanse weerdiens het formeel om verskoning gevra dat die impak van die koue, bekend as ’n “blizzard”, toe nie so erg was soos voorspel is nie.

In dele, veral in die noorde, het die sneeuval egter so dik gelê soos voorspel is – naamlik ’n meter dik.

Na berig word, is minstens 11 mense dood van die winterstorm, hoewel die meeste in ongelukke omgekom het.

Janna Dyer, dogter van die bekende Afrikaanse digter Barend J. Toerien, woon op ‘n perdeplaas in Pennsilvanië. Volgens haar is dit snerpend koud en waag ‘n mens dit net buite as dit nie anders kan nie.