Prins Harry tydens vanjaar se Invictusspele in Kanada. (Foto: Don MacKinnon/AFP)
Prins Harry, die hertog van Sussex, se Amerikaanse visumaansoek word nou deur ʼn regter hersien nadat die Heritage Foundation, ʼn konserwatiewe dinkskrum in die VSA, verlede jaar die federale regering hof toe gesleep het om te bepaal of ʼn visum onregmatig aan die Britse prins toegeken is.
Dié stigting poog om ingevolge die wet op vryheid van inligting die prins se visumaansoek en gepaardgaande dokumente bekend te maak.
Dit kom nadat hy openhartig oor die gebruik van dwelmmiddels soos dagga, kokaïen en towersampioene in sy jonger jare in sy opspraakwekkende memoires, Spare, vertel het.
Die dinkskrum, wat in Washington gebaseer is, het destyds gesê daar moet bepaal word of die hertog danksy sy koninklike status voorkeur geniet het, ondanks die feit dat hy moontlik op sy voltydse aansoek oor sy dwelmmisbruik gejok het toe hy saam met sy vrou, Meghan Markle, in 2020 na Kalifornië verhuis het.
Die egpaar woon tans in ʼn herehuis in die luukse woonbuurt Montecito nadat hulle as werkende Britse koninklikes die tuig neergelê het.
Ingevolge Amerika se wetgewing kan die gebruik van dwelms genoegsame rede wees om iemand se visum af te keur. Prokureurs vir die Amerikaanse regering voer egter aan dat die prins se bewerings in sy boek “nie genoegsame bewys is” dat hy wel dwelms misbruik het nie, berig die Britse koerant The Independent.
WORLD EXCLUSIVE:
Donald Trump warns Prince Harry he could be KICKED OUT of America in stunning GB News interviewhttps://t.co/IRv7QR62Ix— GB News (@GBNEWS) March 18, 2024
Ná die hersiening sal daar besluit word of die dokumente openbaar gemaak gaan word of nie.
Donald Trump, voormalige Amerikaanse president, het in Maart tydens ʼn eksklusiewe onderhoud met die Britse netwerk GB News gesê Harry behoort nie “spesiale voorregte” te hê as die owerhede ontdek dat hy wel tydens sy visumaansoek gejok het nie.
Trump het gewaarsku dat ʼn onsekere toekoms in Amerika vir prins Harry voorlê indien hy weer tot president verkies word.
Bronne: Independent UK, Forbes, New York Times.
die mag van die lewe en dood………..lê in die tong
Dis ook nie asof USA heeltemal dwelm vry is nie.
Die migrante van die suide bring sommer hul eie dwelms saam.
Jy mis die punt Swartbees. Ganie oor dwelmgebruik, gaan oor hy gelieg het op sy aansoek.
Wie gee om, Hyt mos sy keuse met sy vrou gemaak