Brad Binder jaag in Duitsland. (Foto: Ronny Hartmann / AFP)
Daar is twee dinge in MotoGP waarop jy staat kan maak. Eerstens gaan Suid-Afrika se Brad Binder (Red Bull KTM) nie onder die voorste kwalifiseerders wees nie en tweedens gaan hy deur die deelnemers vleg om baie beter te eindig as sy wegspringplek.
Binder het sewende geëindig in die Duitse MotoGP op die Sachsenring en is nou vyfde op die punteleer.
Wêreldkampioen Fabio Quartararo (Yamaha) het sy voorsprong op die punteleer vergroot met ʼn oorwinning al het hy olik gevoel. Hy het in die hitte oorheers. Die Fransman Johann Zarco (Pramac Ducati) was tweede en die Australiër Jack Miller (Ducati Lenovo) in die derde plek.
Quartararo het reeds in die eerste draai die voortou geneem en nooit weer teruggekyk nie.
Dit is sy tweede agtereenvolgende oorwinning en die elfde van sy loopbaan. Sy voorsprong op die punteleer is nou 34 punte oor die Spanjaard Aleix Espargaro. Dit maak nie saak wat gebeur by die Nederlandse MotoGP volgende naweek nie want Quartararo sal steeds bo-aan die punteleer bly voor die somerblaaskans. Daarna hervat die renne in Augustus by Silverstone.
