Wayde van Niekerk kon nie op sy goeie vertonings in aanloop tot die Wêreldkampioenskap voortbou nie en hy het Donderdag sewende in die eindronde van die 400 m-item in Boedapest geëindig.
Die Suid-Afrikaner, wat in baan twee weggespring het, kon aanvanklik by sy teenstanders bly, maar hy het sleg stoom in die pylvak verloor.
Hy moes uiteindelik met ʼn tyd van 45.11 sekondes tevrede wees; aansienlik stadiger as sy vertonings in Pole (44.08 sekondes) en by die nasionale kampioenskap in Potchefstroom (44.17 sekondes).
Al twee dié tye sou vir hom die goue medalje in Boedapest besorg het.
Jamaika se Antonio Watson is die uiteindelike wenner met sy tyd van 44.22 sekondes, gevolg deur Groot-Brittanje se Matthew Hudson-Smith (44.31 sekondes) en Quincy Hall (44.37 sekondes) van die VSA.
“Dit is baie frustrerend en ʼn groot teleurstelling en ek moet aanspreeklikheid vir my vertoning aanvaar. Ek is immers die een wat by die wegspringblokke aangetree het en met ʼn ondergemiddelde lopie vorendag gekom het. Dinge het glad nie reg vir my verloop nie,” het Van Niekerk gesê.
Die 31-jarige atleet is die wêreldrekordhouer in die item nadat hy by die Olimpiese Spele in Rio de Janeiro atletiekliefhebbers op hul voete gehad het met sy blitsige tyd van 43.03 sekondes.
ʼn Ernstige kniebesering het vroeër gedreig om sy atletiekloopbaan te ontspoor maar te danke aan sy deursettingsvermoë en harde werk is hy weer terug op die internasionale verhoog.
What a home straight ????
????????'s Antonio Watson is your 400m world champion!#WorldAthleticsChamps pic.twitter.com/n8Eroypaz2
— World Athletics (@WorldAthletics) August 24, 2023
Dan kon Luxolo Adams (20.44 sekonde), Sinesipho Dambile (20.28 sekondes) en Sean Maswanganyi (20.65 sekondes) nie na die 200 m-eindronde deurdring nie.
Dambile het wel die beste tyd van sy loopbaan in sy wedren gehardloop.
Suid-Afrika kon nog nie ʼn enkele medalje by die Wêreldkampioenskap inoes nie.
400 m-eindronde:
- Antonio Watson: 44.22 sekondes
- Matthew Hudson-Smith: 44.31 sekondes
- Quincy Hall: 44.37 sekondes
- Vernon Norwood: 44.39 sekondes
- Sean Bailey: 44.96 sekondes
- Havard Ingvaldsen: 45.08 sekondes
- Wayde van Niekerk: 45.11 sekondes
- Kirani James (gediskwalifseer)
Wayde, jy het jou beste gegee, was wonderlik dat jy ons kon verteenwoordig.