Dis neusie verby vir Proteas

Die Proteas kan nie meer vir die halfeindstryde kwalifiseer nie. Foto: Cricinfo.

In een van die Monty Python-komedies veg koning Arthur teen ’n dapper ridder in ’n woud. Arthur kry stelselmatig die oorhand en kap (grappenderwys natuurlik) die ridder se ledemate die een na die ander af.

Maar die beserings skeel die ridder min en hy veg vrolik voort, totdat hy naderhand sonder arms en bene wou aanhou baklei.

Bogenoemde verhaaltjie kan in ’n neutedop opgesom word: Soms moet jy – al is jy hóé optimisties – maar die aftog blaas en besef jy is net nie goed genoeg nie.

Die Proteas, wat nes die ridder in die Wêreldbeker-kriekettoernooi met optimistiese perskonferensies wou voortbaklei, se halfeindstryd-drome is gister op Lord’s die finale nekslag toegedien toe Pakistan hulle met 49 lopies geklop het.

Dit is nou amptelik onmoontlik vir die span om vir die halfeindstryd te kwalifiseer.

Snaaks genoeg het Faf du Plessis se span vroeër vanjaar die einste Pakistan-span oortuigend in ’n eendagreeks hier in Suid-Afrika oordonder. Wêreldbeker-wedstryde is egter ’n perd van ’n ander kleur vir die Proteas.

Die Suid-Afrikaanse boulaanval het 308 lopies afgestaan en net die 40-jarige Imran Tahir (2/41) het werklik ’n verskil gemaak.

Die bybreekbouler het in die proses ook Suid-Afrika se voorste Wêreldbeker-paaltjievraat geword, toe hy Allan Donald se rekord verbygesteek het.

Daarna kon die Suid-Afrikaanse kolwers nie veel doen nie en net Du Plessis (60) en Quinton de Kock (47) het weerstand gebied. Een van hulle moes egter ’n honderdtal geslaan het om die wedstryd vir die Proteas te beklink.

David Miller – wat met ’n liesbesering gekolf het – en Rassie van der Dussen het hul paaltjies verloor toe hulle die lopies teen ’n vinnige tempo moes jaag en die Proteas sou waarskynlik verder verloor het as dit nie vir Andile Phehlukwayo (46*) se beurt was nie.

“Die Wêreldbeker is beslis die laagtepunt in my loopbaan,” het ’n gefrustreerde Du Plessis in die perskonferensie ná afloop van die kragmeting gesê.

“Dit voel asof ons dieselfde foute oor en oor maak en ek moet dieselfde woorde gereeld tydens mediakonferensies gebruik.”

Die Protea-kaptein het gesê dat die boulers, buiten Tahir, nie goed genoeg geboul het nie en dat die kolwers weer eens nie opgewasse was vir die taak nie.

“Ons het seker so 30 lopies te veel afgestaan en van die kolwers het goed begin, net om hul paaltjies op onnodige tye te verloor.”

Hy het bygevoeg dat die span tans met min selfvertroue speel en dat dit tot onnodige foute op die veld lei. “Ek is ’n trotse speler en kaptein en ons vertonings begin nou al ’n verleentheid te word. Ons probeer ons beste, maar dit is net nie goed genoeg nie.”

Die Proteas moet nog teen Sri Lanka en Australië speel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Ben

Die Proteas se bestuur sit hulle beste spelers in die wedstryde die jaar voor die Wêreld Beker. Dan wen hulle al die Spanne. Is Nommer een in die Wêreld. Die ander spanne speel met hulle tweede beste spanne. Teen die tyd dat die Wêreld beker gespeel word is al ons spelers uitgebrand of beseer. ” The name of the game is poker” , Ons kies ook spelers wat nie in vorm is nie – Die kotas stelsel KILL ons sport want daar is nie diepte in ons land nie.

Koos

Kaptein kortmoutjies jul kan nou maar ontspan. O skuus julle het mos die wereldbeker reeds ontspanne ingegaan en om dit te geniet.

kolla

Kolfwerk is al vir maande pateties met net Du Plessis en De Kock wat voor die toernooi op vorm was. Die boulers het ons in die reekse hier op eie bodem gered maar die kolfblaaie in Engeland verleen geen hulp aan die boulers nie. So die logiese gevolg is dat ons nie genoeg lopies aanteken om daar te kan wen nie.

m.d.r.

Iets is nie pluis in hierdie span nie. Rabada, wat naas die beseerde Dale Steyn on voorste snelbouler is , het vanaf die eerste wedstryd nie eers gevaarlik gelyk nie Dieselfde geld vir die ander boulers, behalwe Tahir.
Hoekom het Dwayne Pretorius nie kans gekry nie ?
Dit lyk of die boulers veral nie kon besef dat mens in Engeland nie op dieselfde lengtes kon boul as in SA nie. Die blaaie daar gee net nie dieselfde wip as in SA nie.
Miskien moet mens meer lees in Duane Olivier se besluit om liewer graafskap krieket as om vir SA te speel…….

JohanL

Wel dit is regtig ‘n pyniging om na hulle te kyk – ek self kon net nie klaar kyk nie.

Ten minste is Faf eerlik (speel met min selfvertroue en vertonings is ‘n verleentheid).

In nabetragting (wat ‘n wonderlike ding is dit nie !) is die span verkeerd bestuur en het veroorsaak dat omtrent alle spelers nie volgens potensiaal speel nie.

Met die poel in SA waaruit ander opsies gekies kan word wat maar baie swak lyk, dink ek daar wag bitter swaar tye vorentoe vir die Proteas.