‘Bok vir sports’: Johan de Jonge sê jammer

Johan en Martie de Jonge saam met die Martin Bester se ontbytprogramspan op Jacarandafm. Foto: Jacarandafm se Twitter-rekening.

Johan de Jonge, die man wat gedurende die Wêreldbeker selfs die rustigste Bok-ondersteuner (op ’n ekstra dosis anti-depressante) woedend gehad het, het vandag in Jacarandafm se ateljee ’n Springboktrui aangetrek.

De Jonge het vroeër opslae op sosiale media gemaak nadat hy ’n video gemaak het waarin hy die Bokke en hul ondersteuners behoorlik sleggesê het.

“Vir al die Bok-supportertjies wat vir my en my vriende so op Facebook vloek: Dít is waarom julle span verloor. Hou aan om ons te vloek, dit is reg; julle span sál nie met ’n Wêreldbeker(trofee) geseën word nie,” het De Jonge in ’n All Blacks-trui in die video gesê.

Maar, het hy vandag vir Martin Bester gesê, daardie man in die video is nie die Johan wat sy vrou en vriende ken nie.

“Ek is glad nie anti-Springbok nie. Ek haat nie die land nie en ek haat nie die Springbokke nie,” het hy vandag gesê terwyl sy vrou, Martie, toekyk.

“Selfs al sou die All Blacks teen Engeland gewen het, sou ek nie weer só ’n video gemaak het nie. Die video het my uitgeput en ek het soggens om 03:00 nog in my bed gelê en rondrol. Vandag voel ek baie sleg oor die video; dit is nie wie Johan de Jonge is nie.”

Bester en sy span het vir De Jonge-hulle lekker gegeurde frikkadelle voorgesit – na aanleiding van sy “spicy meatball”-insetsel op die gewraakte video.

Hy moes daarna hiervolgens die lede van die publiek se kommentaar jeens hom beoordeel – of dit liggies gegeur was en of dit trek-die-melkglas-nader-vuurspoeg-warm was.

De Jonge in sy gewraakte video. Foto: YouTube-kanaal.

Hoewel daar steeds ’n paar ontstoke luisteraars was wat hom boonop as ’n hartseer figuur uitgekryt het, was daar ook baie positiewe boodskappe.

“Hy kan ondersteun wie hy wil en ek is eintlik baie bly hy het daardie video gemaak. Ek dink as dit nie daarvoor was nie, sou ons dalk nie die Wêreldbeker gewen het nie,” het ’n inbeller gesê.

De Jonge het daarna Bester se Springboktrui aangetrek en hoewel hy aanvanklik huiwerig was, het hy selfs ’n liriek of twee van “Hier kommie Bokke” gesing.

Bester het hom daarna die geleentheid gegee om sy oorspronklike video effens te redigeer en De Jonge het in sy nuwe trui gewys dat hy darem ’n Bok vir sports is.

“Die Springbok-partytjie is nog beter as die All Blacks-partytjie,” het hy sy eie video se inleiding sommer só in die ateljee geredigeer.

“Ek wil net vir Suid-Afrika en die Springbokke sê: Baie geluk met die Wêreldbeker; julle verdien dit. Jammer oor die video, my filmdae is definitief verby!”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

87 Kommentare

jongste oudste gewildste
A Klaassen

Sou mens met ‘n stok in die byenes krap dan kan jy nie agterna huil as jy gesteek word nie. Wat het hy tog verwag.

Salamander

Verskoning aanvaar!

Maria

Vergifnis is aanvaar.

HAB

Nuwe respek vir jou.
Dit vat n man om reg te maak.
Well done Johan de Jonge

Stoffel

Johan is baie snaaks, lekker gelag en het sy video geniet,