Die vyf boere op vanjaar se seisoen van Boer soek ʼn vrou het behoorlik gebloos tydens hul ontmoeting met die tien vroue wat hulle gekies het uit stapels briewe wat hulle ontvang het.
In Donderdagaand se episode van dié gewilde werklikheidsreeks het boere Francois, Philru, Louis M, Louis B en Hennie eers saam met aanbieder Marciel Hopkins gekuier voordat hulle vyf minute saam met elkeen van die vroue kon deurbring.
“Kyk, as ons nie liefde gekry het nie, het ons definitief ʼn paar pêlle gekry,” het Louis M tot die vermaak van die ander boere geskerts.
Dit is die eerste keer in twee jaar wat die boere saam onder een dak kon kuier vóór die aanvang van die blitsafsprake, aangesien die programformaat vir die vorige twee seisoene verander moes word om Covid-maatreëls toe te pas.
Die blosende boere en opgewonde vroue het by die Grande Roche-landgoed in die Paarl, Wes-Kaap ontmoet.
Die boere was ooglopend senuweeagtig, en sommige van hulle het nie geweet waar om te kyk nie.
“Hoe kies jy? Dis soos ʼn kind in ʼn speelgoed factory,” het ʼn bloedrooi Louis M geskerts.
Daar was selfs ʼn paar knoppe in die keel toe die boere die vyf vroue wat deurdring na die volgende ronde van die program gekies het.
- Boer soek ʼn vrou is elke Donderdagaand om 20:00 op kykNET, DStv-kanaal 144, te sien.