Diamante nie genoeg om van dié ‘Real Housewives’ vriende te maak

Peet Viljoen het gesorg dat daar genoeg drama in Donderdagaand se episode opgedis word. (Foto: Skermgreep)

Daar word gesê diamante is ʼn vrou se beste vriend, maar selfs dié duur klippies kan nie van al die Real Housewives van Pretoria vriende maak nie.

Mel Viljoen en haar man, Peet, het in Donderdagaand se episode besluit om die ander vroue te bederf met ʼn “Tammy Taylor Diamond Day” waartydens regte diamante deur ʼn spesiale manikuurproses op die vroue se naels aangebring is.

Dié skitterende kuier was die eerste keer wat die Viljoens gasheer gespeel het vir Kiki, Renske, Marié, Rhona en Talana, oftewel die “sandput van verveelde huisvroue” soos Peet na hulle in dié episode verwys.

Die huisvroue is elk met ‘n R10 000 se diamant bederf. (Foto: Skermgreep)

Dié gewese prokureur het gesorg dat daar genoeg drama in Donderdagaand se episode opgedis word en het ʼn dramatiese verskyning kompleet met twee lyfwagte gemaak om die vroue se diamante persoonlik te kom aflewer.

Hy het boonop vooraf sy vrou met ʼn indrukwekkende diamanthaelsnoer verras om seker te maak “niemand skitter meer as sy” by dié geleentheid nie.

Die voormalige EFF-LP Magdaleen Moonsamy – wat tans ook deur die sangeres Kelly Khumalo aangestel is om hofverrigtinge te volg in die Senzo Meyiwa-moordverhoor –  het saam met haar eie lyfwag, ene Lucky, ook by dié geselligheid aangesluit.

Rhona se besluit om saam te kuier, maar nie soos die ander vroue haar naels te laat glinster met R10 000 se diamante nie, het Peet duidelik onthuts gelaat.

Peet het het ʼn dramatiese verskyning kompleet met twee lyfwagte gemaak. (Foto: Skermgreep)

“Hulle dink waarskynlik ek is kômmin omdat ek dit nie in my naels wil sit nie, maar jy gaan my nie oortuig nie. Ek het voet by stuk gehou dat ek nie ʼn diamant op my naels gaan sit nie,” het Rhona oor haar besluit gesê.

“Ek dink Rhona is baie dom om nie ʼn diamant te vat as dit vir jou gegee word nie. Verniet, jy hoef niks eers te doen nie. Die feit dat sy nee sê concern my geweldig,” het TikTokker Kiki hieroor bygevoeg.

Dié gesprek het vinnig in ʼn vergelykende bekgeveg oor kwalifikasies tussen Peet en Rhona ontaard toe sy vra of hy óók onderwys studeer het siende dat hy van lewenswyshede met haar oor haar besluit wou deel.

Rhona het nie teruggestaan vir Peet se opmerkings nie. (Foto: Skermgreep)

Volgens Peet was sy regsgraad “duurder en moeiliker” om te verwerf as Rhona se onderwyskwalifikasie.

Dié voormalige onderwyser het agterna teruggekap en gesê dat sy kan terugkeer na die onderwys, terwyl Peet van die rol geskrap is weens ʼn hangende saak oor onder meer beweerde onwettige eiendomtransaksies. “As só iets gebeur dink ek nie dit maak regtig saak wat jy studeer het nie.”

“As ek in ʼn argument moet betrokke raak met Rhona oor of haar onderwysdiploma gelykstaande is aan my regsgraad dan bewys ek net dat daar twee sotte om daardie tafel was,” het Peet agterna vir kykNET se kameraspan gesê.

Die Real Housewives van Pretoria is elke Donderdagaand om 20:00 op kykNET, DStv-kanaal 144, te sien. Dit word ook op DStv CatchUp uitgesaai.