Foto: pixabay.com
Ek pleit by julle in die Naam van ons Here Jesus Christus om eendragtig saam te staan – één in julle oortuigings. Daar mag nie groepvorming onder julle wees nie. Julle moet van harte saamstem in julle denke en in julle visie. (1 Korintiërs 1:10)
’n Huisgesin leef baie nou saam met mekaar. En juis omdat hulle so naby aan mekaar leef, raak hulle soms ongeduldig en geïrriteerd met mekaar.
Hoeveel keer het dit nie al in julle huis gebeur dat iemand die laaste koekie in die pakkie vat of die laaste melk gebruik nie. Dalk maak iemand ’n geraas terwyl jy oor die telefoon wil praat. Ons raak knorrig en geïrriteerd en die vrede in die huis word versteur.
Net so raak ons knorrig met ons werksmense. Maar ons hoef nie te baklei en ons humeur te verloor nie. Ons kán kies om oor die weg te kom en as ’n span op te tree. Ons kan saamstem oor wat ons besluit en beplan. Omdat ons vir Jesus ken, kan ons almal in harmonie saamleef.
Daar staan in Efesiërs 4:4-6: “Daar is net één Gees, net soos julle net één toekomsverwagting het op grond van julle roeping – één Here, één geloof, één doop, één God, ons almal se Vader; Hy heers oor almal, werk deur almal en woon in almal.” As ons Jesus gehoorsaam, sal Hy ons almal eensgesind maak.
Here, help ons asseblief om in u liefde in vrede en eensgesindheid saam te woon en te leef. Amen.
Here ek verloor so gou moed as ek na die chaos om my kyk…dan onthou ek weer U is in beheer…Amen