Thato Mosehle, wat verlede jaar op die Mej. Suid-Afrika-verhoog as Mej. Supranasionaal Suid-Afrika 2020 gekroon is, het Woensdag na Pole vertrek om aan dié internasionale kompetisie deel te neem.
Shudufhadzo Musida, Mej. Suid-Afrika, en Natasha Joubert, Mej. Heelal Suid-Afrika, het Mosehle op die OR Tambo-lughawe in Johannesburg afgesien.
Mosehle sal aan die 12de jaarlikse Mej. Supranasionaal-kompetisie deelneem, wat op 21 Augustus in Nowy Sącz, Pole, plaasvind.
Sy is die eerste persoon wat amptelik onder die vaandel van die Mej. SA-organisasie deelneem. Die wenner sal deur Anntonia Porsild van Thailand, Mej. Supranasionaal 2019, as haar troonopvolger gekroon word.
Haar nasionale kostuum is ontwerp deur Sello Medupe, eienaar van Scalo. Dit is geïnspireer deur die voorkoms van ʼn Afrika-krygerprinses met elemente van Mosehle se Sotho-kultuur en ‑erfenis daarin verweef.
“Die Mej. Supranasionaal-kompetisie het ʼn nasionale kostuum vereis wat ʼn persoonlike verband hou met die deelnemer,” verduidelik Werner Wessels, kreatiewe direkteur van die Mej. SA-organisasie.
“Aangesien Thato ʼn dokter is, wat op die voorste linies teen Covid veg, wou ons wys hoe sy nie net haarself sien nie, maar ook haar kollegas – as krygers. Ons wou ook iets persoonlik uit haar kultuur insluit in die vorm van ʼn tradisionele kombers genaamd ʼn seanamarena, wat vertroosting, hitte en trots simboliseer wat sy vir haar mense voel.
“Ons, as ʼn organisasie, is so trots daarop om ʼn uitrusting te vertoon wat werklik ons land verteenwoordig,” sê Wessels.
Haar uitrustings vir die dag is ontwerp deur Willet Designs Couture, Malondie, Sheriff Taylor, Ernst Schultz en Juan William Aria. Haar aandrokke is deur Kobus Rautenbach en Anél Botha ontwerp.
“Ek is mal oor my klerekas en al hierdie ongelooflike Suid-Afrikaanse ontwerpers wat ʼn manier gevind het om my spesiaal te laat voel,” sê Mosehle.
Meer besonderhede oor die Mej. Supranasionaal-kompetisie sal op Mej. SA se amptelike webwerf en sosialemediaplatforms bekend gemaak word. Daar kan ook vir Mosehle op haar sosialemediaplatforms gestem word.
Mej. Suid-Afrika word aangebied deur Weil Entertainment in samewerking met M-Net, Mzansi Magic en Sun International.
Die nuwe Mej. SA sal op 16 Oktober by die Grand West Arena in Kaapstad gekroon word. Kyk hier na die top-10.
uhm… ekt regtig meer verwag. meer kleurvol soos die nasie wat ons is.
Dis ‘n kombers…… En ek is seker dom, maar wat is Supranasionaal?