6 swaar gestraf vir plaasmoord

Billy van Rooyen en sy vrou, Karlien. Foto: Facebook

Ses mans wat in 2016 ʼn familie op ʼn plaas in die Gluckstadt-omgewing naby Vryheid aangerand en twee familielede gedurende die aanval doodgeskiet het, is elkeen twee lewenslange tronkstrafvonnisse opgelê.

Lt.kol. Thulani Zwane, woordvoerder van die polisie, het Maandag in ʼn verklaring gesê die mans is Vrydag in die Vryheid-hooggeregshof gevonnis nadat hulle skuldig bevind is aan twee aanklagte van moord, poging tot moord, roof, aanranding met die doel om ernstig te beseer, twee aanklagte van ontvoering asook die besit van onwettige vuurwapens.

Maroela Media het vroeër berig altesaam agt verdagtes is destyds in hegtenis geneem nadat ʼn groep mans in April 2016 op die plaas in die Swart Umfolozi-distrik naby Gluckstadt toegeslaan het.

Billy van Rooyen (37) en sy skoonpa, Ronnie Lombard (62), is gedurende die aanval doodgeskiet en twee familielede is in die aanval beseer. Die verdagtes het met ʼn onbevestigde bedrag kontant gevlug. Die saak is by die Gluckstadt-polisie ingedien waarna die ondersoek deur die provinsiale taakspan oorgeneem is.

Een van die verdagtes, Thulani Hloniphani Sibiya (38), is reeds in 2017 twee lewenslange tronkstrafvonnisse opgelê met ʼn bykomende tronkstraf van 40 jaar nadat hy skuld beken het op twee aanklagte van moord, twee van poging tot moord, een van gewapende roof en een van ontvoering.

Nóg ’n verdagte, Bongani Miya (36), is ure ná sy inhegtenisneming in aanhouding dood. Die polisie het vroeër gesê hy het homself glo in ʼn toilethokkie met ʼn bedlaken opgehang.

Die ander ses was sedertdien in aanhouding, het Zwane gesê.

Msizeni Joseph Shezi (35) is twee lewenslange tronkstrafvonnisse opgelê met ʼn bykomende 41 jaar. Lindokuhle Zulu (35) is twee lewenslange tronkstrafvonnisse opgelê met ʼn bykomende 46 jaar. Gcinimali Dladla (40), Themba Mhlanga (28), Mondli Nkosi en Mngcineni Gazu (29) is elkeen twee lewenslange tronkstrafvonnisse opgelê met ʼn bykomende 33 jaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
chrisjan

Free board and lodging with free medical aid for life!Nice!No worries further.

CallieL

Dan eet hulle beter as die meeste armes in die land.

Ai.

Mooi Bongani jy het die regte ding gedoen..en wens net jou medebeskuldiges wil ok die regte ding doen! Jul verdien niks minder nie!

SjN

Vir die res van hul lewe sal hul versorg word op die belasting betalers se sak, onregverdig.

Ruaan

Twee lewenslange vonnisse is betekenisloos. Hulle gaan in elk geval na 20 jaar op parool vrygelaat word. Dieselfde geld vir die 33 jaar. Enige bepaalde vonnis word in elk geval samelopend met die lewenslange vonnis uitgedien. Klug, ons regstelsel!!!! Lewenslank moet wees wat dit veronderstel is om te wees – vir die res van jou natuurlike lewe. Doodstraf nog steeds die beste.