Die departement van internasionale betrekkinge (Dirco) het Saterdag gesê dat alle Suid-Afrikaners waarvan hulle bewus is, nou uit die oorloggeteisterde Soedan is.
Een groep Suid-Afrikaners sal na verwagting Saterdagmiddag by die OR Tambo-lughawe aan die Oos-Rand land.
“ʼn Ontruiming soos dié is nie maklik nie en word deur verskeie uitdagings en frustrasies in die gesig gestaar,” het Clayson Monyela, woordvoerder van die departement, in ’n inskrywing op Twitter gesê.
Monyela sê Dirco waardeer die hulp en samewerking van die noodledigingsorganisasie Gift of the Givers asook lande soos Egipte, Saoedi-Arabië en Soedan.
“’n Groep van ons burgers het Jeddah van Port Soedan af ingekom. Ons konsul-generaal en sy span het hulle ontvang en ondersteuning gebied. Hul werkgewer het vir die vliegtuigkaartjies betaal en hulle sal vanmiddag [Saterdag] om 16:15 by die OR Tambo-lughawe aankom,” het Monyela gesê.
“Die groepe wat met busse uit Khartoem geneem is, het die grens na Egipte oorgesteek.”
Die regering het vir twee van dié busse betaal terwyl Gift of the Givers vir ’n bykomende bus betaal het.
Monyela sê al die mense op dié busse is tans by hotelle in Egipte wat deur die regering bespreek is. Die regering sal ook vir vliegtuigkaartjies betaal.
Besonderhede oor hul terugkoms sal mettertyd bekend gemaak word.
Evacuation of SA nationals from #Sudan…update. We can now confirm that all SA nationals we know of are out of Sudan. Evacuations like this are not easy & face multiple difficulties & frustrations. We appreciate the partnerships & collaboration of Gift of the Givers, countries… pic.twitter.com/vJ8ZHMpGz1
— Clayson Monyela (@ClaysonMonyela) April 29, 2023