“Barmhartige samaritaan” se storie dalk ʼn foefie

Don Percival, ʼn inwoner van Harare in Zimbabwe wat beweer hy het Maandag die “Smith-egpaar van Suid-Afrika” gered toe hulle deur drie mans aangeval is, se storie klop nie lekker nie.

Maroela Media het Woensdag berig Percival het die egpaar gered nadat drie mans glo hul voertuig, ʼn wit Toyota-dubbelkajuitbakkie, wou steel. Nadat Maroela Media die berig en foto’s van Darren Smith, een van die vermeende slagoffers, gepubliseer het, het lesers gou aangevoer dit lyk of die foto’s geposeer is.

“Darren”

Percival is die uitvoerende hoof van Goddunnit Promotions, ʼn maatskappy wat natuurlewefilms in Zimbabwe vir ondermeer National Geographic vervaardig. Hy het selfs Woensdag aan Maroela Media gesê God het hom die krag gegee om die aanvallers ʼn goeie loesing te gee.

“Sharon”

Die foto’s wat hy van die sogenaamde slagoffers op sy Facebook-blad gelaai het, blyk nou egter foto’s te wees wat van die internet af bekom is. Die ene “Darren” op die foto’s is egter die Russiese tennisspeler, Marat Safin, wie se foto op dié webwerf verskyn. Die foto van “Darren” se vrou, Sharon, is ook ʼn bekende televisieaanbieder van Engeland, Anna Richardson, wie se foto hier bekom is. Percival het intussen die foto’s en sy verhaal van sy Facebook-blad verwyder.

Toe Maroela Media hom Donderdag daaroor uitvra het hy gesê dit het te veel opslae gemaak. Hy het egter volgehou dat die voorval wel plaasgevind het en het gesê hy sal “nooit so iets opmaak nie”.

Nadat hy oor die foto’s van die bekendes uitgevra is, het hy gesê dat dit is volgens hom die “Smith-egpaar”. Hy het gesê soos hy dit verstaan doen die “egpaar” ʼn wêreldtoer en weet hy nie waar hulle hulself nou bevind nie. Hy het voorts gesê hy vermoed dat die “egpaar” die saak by die Hatfield-polisiestasie in Harare aangemeld het.

ʼn Woordvoerder van die Hatfield-polisiestasie in Harare het intussen aan Maroela Media gesê dit is baie moeilik om ʼn saak sonder ʼn saaknommer op te spoor. Hy is egter nie bewus van enige soortgelyke saak wat Maandag of Dinsdag by die polisiestasie aangemeld is nie. Hy sal egter hul rekords nagaan en so gou as moontlik terugvoer gee.

Lees ook:
Foto’s: Barmhartige samaritaan red SA-egpaar tydens Zim-aanval