Begrafnisondernemer ondersoek ná lyke op snelweg beland

Foto: Twitter via @JMPDSafety

Die private begrafnisondernemer wat Woensdag die 42 doodskiste met liggame daarin vervoer het wat op M1-snelweg in Johannesburg beland het nadat wiele van die sleepwa losgekom het, het glo nie die nodige dokumentasie gehad om die liggame te vervoer nie.

Maroela Media het vroeër berig die voorval het omstreeks 09:45 op die M1-Suid naby Braamfontein gebeur toe die lyke van die Charlotte Maxeke-hospitaal na die Olifantsvlei-begraafplaas vervoer is. ʼn Woordvoerder van die JMPD het gesê die wiele van die sleepwa het losgekom en die doodskiste het op die snelweg uitgeval. Die verkeer was vir langer as ses uur ontwrig terwyl owerhede die voorval ondersoek en die toneel opgeruim het.

ʼn Woordvoerder van die Gautengse departement van gesondheid het vroeër gesê al die liggame was ongeskonde ná die voorval.

Gwen Ramokgopa, LUR vir onderwys in Gauteng, het Donderdag ʼn voorlopige verslag oor die voorval aan die Gautengse wetgewer voorgehou. Volgens Ramokgopa was 26 van die liggame doodgeboortes waarvan die familie verkies het om nie die liggame huis toe te neem nie en die regering versoek het om dit namens hulle te begrawe.

Foto: Twitter via @JMPDSafety

Ramokgopa het gesê die voorlopige verslag dui daarop dat daar ʼn oortreding van die wet was, insluitend die begrafnisondernemer wat nie die nodige dokumentasie aan die polisie kon toon nie. Sy het gesê die hospitaalbestuur het dus ook versuim om die begrafnisondernemer vir die nodige dokumentasie te vra voordat hy die hospitaal met die liggame verlaat het.

“Ek het reeds die hospitaal opdrag gegee om die nodige stappe te doen om die nienakoming van beleid in hierdie verband reg te stel. Ek het gaan kyk na die regulasies van die hospitaal oor die vervoer van liggame en gevind daar is geen duidelike spesifikasies hieroor nie. Ek het daarom die waarnemende hoof van die departement opdrag gegee dat hierdie spesifikasies onmiddellik opgestel word,” het Ramokgopa gesê.

Ramokgopa het die voorval as baie onaangenaam en onaanvaarbaar beskryf. “Selfs in gevalle waar ʼn oorledene se naasbestaandes nie opgespoor kan word nie, is ons volgens wet verplig om die persoon op ʼn waardige en respekvolle manier te begrawe. Ek het opdrag gegee dat die begrafnisproses van hierdie liggame vir sewe dae uitgestel word om families wat dalk nog graag hul geliefdes wil kom uitken daardie geleentheid te gee.”

Sy het gesê sy is vasbeslote om die saak deeglik te ondersoek sodat al die regstellende maatreëls ingestel word om te verseker dat so iets nooit weer gebeur nie. “Enigiemand wat nie sy of haar verantwoordelikhede nagekom het nie, moet aanspreeklik gehou word.”