Belfast-vrieskasmoorde: Polisie verwelkom vonnisse ná egpaar se gru-dood

Rudolf en Elma van Heerden. Foto: Verskaf.

Rudolf en Elma van Heerden. Foto: Verskaf.

Drie mans is gevonnis in verband met die moorde op ʼn bejaarde egpaar van Belfast, wie se liggame in Januarie 2013 in ʼn vrieskas gevind is.

Kol. Leonard Hlathi, woordvoerder van die polisie, het gesê Bongani Joseph Ncongwane (25), Irvin Brown Nkosi (22) en Chqarles Sibusiso Sibanyoni (29) is Woensdag in die Pretoriase hooggeregshof, wat in Middelburg gesit het, gevonnis.

Rudolf en Elma van Heerden, albei 79, is in hul huis oorval en met ʼn stomp voorwerp geslaan en verwurg. Hul liggame is in ʼn vrieskas in die vertrek langs hul slaapkamer gevind. Hul hande en voete was vasgebind.

Volgens Hlathi is polisiebeamptes op 9 Januarie 2013 na die egpaar se huis ontbied nadat die bure gesien het die kombuisvenster is stukkend en die diefwering is gebuig. Met die polisie se aankoms op die toneel, het hulle gesien die motorhuisdeur is oop en dat daar nie ʼn motor was nie.

Die egpaar se Toyota Prado is later langs die N4-hoofweg naby Middelburg gevind. Ncongwane en Nkosi is op 14 Januarie 2013 in onderskeidelik Lydenburg en Pretoria in hegtenis geneem. Sibanyoni is op 28 April 2013 in Witbank in hegtenis geneem.

Hlathi het gesê Ncongwane is gevonnis tot 20 jaar tronkstraf op twee aanklagte van moord en 15 jaar tronkstraf vir roof en huisbraak met die bedoeling om te roof. Hy sal effektiewelik 30 jaar tronkstraf uitdien.

Nkosi en Sibanyoni is elk twee keer lewenslange tronkstraf opgelê vir die moorde, 15 jaar tronkstraf vir roof en huisbraak met die bedoeling om te roof, drie jaar tronkstraf vir die besit van ʼn vuurwapen sowel as drie jaar tronkstraf vir die onwettige besit van ammunisie.

Die polisie in Mpumalanga het die vonnisse verwelkom en gesê hulle hoop dit sal ander kriminele afskrik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
celeste

Dis so tragies. Wat kon die arme twee mense regtig aan inbrekers doen. Was dit regtig nodig om so ver te gaan. Geen vonnis sal ooit kriminele afskrik behalwe die doodstraf nie. Tronke is vir die soort kriminele soos n 5 ster hotel. Sulke mense sal nooit verander nie. Mens raak bitter as mense sulke berigte lees.

Pierre Celliers

Hierdie vonnise beteken niks! Dis nie te se hulle gaan die volle termyn sit nie. Ons weet mos nou al hoe werk ons regstelsel. Ons sien hulle weer op straat binnekort.

SNEL

Dis vreeslik om dit weer te lees (onthou nog die gebeure in die koerant toe dit gebeur het) en te dink dis iemand se ouers wat so wreed vermoor is en behandel is asof hulle niks is nie. Hulle stap n pad en op 79 jarige ouderdom (wat n wonderlike hoë ouderdom is en veral om saam met jou geliefde daai hoë ouderdom te bereik), moet hulle nou so ontneem word om ouer as 80 te word en om op natuurlik wyse op n hoë ouderdom tot hul einde te kom. My hart gaan uit na hul kinders en familie,… Lees meer »

bekendes

Dit was vreeslike nuus vir die Belfast inwoners toe ons hoor oom Koffie en sy vrou is vermoor. Dis erg om so iets te lees maar dis nog erger as jy die mense geken het. Ek wens die dinge kan end kry dis so onnodig!!!!

Christie Joubert

Is dit nie dieselfde pesgoed wat gelag het toe hulle gevonnis is nie?