Cachalia uit DA se skadukabinet geskop

Ghaleb Cachalia (Foto: DA)

Die DA het sy woordvoerder vir openbare ondernemings uit sy amp verwyder oor uitlatings wat hy oor die konflik tussen Israel en Gaza gemaak het.

Die party het gesê daar is ooreengekom dat lede van die party hulle sou weerhou van “openbare uitlatings wat daarop gemik is om verdere verdeling aan te blaas”, en dat Ghaleb Cachalia versuim het om dié ooreenkoms na te kom.

Cachalia het Dinsdag op die sosialemediaplatform X (voorheen Twitter) uitgevaar teen die situasie in die Midde-Ooste deur te sê dat hy hom nie sal laat stilmaak nie, en dat Israel besig is om volksmoord te pleeg.

I will not be silenced.
Israel is committing Genocide.
Full ???? BLOODY ???? stop.

— ghaleb cachalia. MP (@GhalebCachalia) October 31, 2023

John Steenhuisen, leier van die DA, het in ʼn brief ʼn paar dae later Cachalia in kennis gestel dat sy openbare uitlatings oor die situasie die rede is waarom hy nie voorts as woordvoerder van openbare ondernemings vir die DA sal optree nie.

Cachalia gaan eerder nou sy “wetgewende en toesighoudende pligte uit die agterbanke” voortsit.

So I’m now a backbencher.
Certainly going to make life less hectic. pic.twitter.com/02XKMkpvyn

— ghaleb cachalia. MP (@GhalebCachalia) November 2, 2023

Steenhuisen voer aan dat daar in gesprek getree is met Cachalia oor sy bewerings dat hy “stilgemaak” word, asook sy “verontagsaming van ʼn koukusbesluit” oor die DA se standpunt oor die konflik waaraan hy twee weke vantevore deel gehad het.

“Steeds was jy opstandig,” het Steenhuisen aan Cachalia gesê.

“Dit het daarna geblyk dat jy ook die media hieroor betrek het op ʼn manier wat verder verdeeldheid aangewakker het.”

Volgens Steenhuisen was Cachalia “selfsugtig” om die uitlatings te maak, en het hy ʼn formele besluit deur die DA verontagsaam.

Ná die terreuraanval op Israel het die DA ooreengekom dat hy ten gunste is van ʼn twee-staat-oplossing, maar dat humanitêre hulp ten alle tye vir Gaza beskikbaar moet wees. Die DA se woordvoerder vir internasionale betrekkinge en samewerking sou ook as woordvoerder oor die situasie opgetree het.

Steenhuisen het aan Cachalia geskryf dat sy optrede “ʼn koukusbesluit opsetlik verontagsaam” en dat dit Steenhuisen se leierskap ondermyn wat “onbetaamlik is vir iemand wat ʼn senior pos in my skadukabinet beklee”.

Volgens die DA is dit die ANC se versuim om teen kabinetslede op te tree een van die redes waarom Suid-Afrika tans in alle soorte krisisse sit.

“Een van die DA se doeleindes met die skadukabinet is om te demonstreer dat ons party anders is. Enige optrede deur lede van die DA se skadukabinet wat, soos die ANC se kabinet, die strewe na enige eiebelang bo die gemeenskaplike belang demonstreer, moet dus deur gepaste optrede regverdig word,” het Steenhuisen gesê.

Cachalia het in reaksie op die gelekte brief gesê dat hy nie met Steenhuisen se weergawe van gebeure saamstem nie, maar dat hy nie hare gaan kloof oor wie wat gesê het nie.

“Ek bly getrou aan die waardes en beginsels van die DA,” het hy gesê.

“Ek sal voortaan ʼn wakende oog oor menseregtevergrype hier en wêreldwyd hou, en sal my deurgaans daarvoor beywer om die waarheid te laat seëvier.”

My statement on my dismissal from the DA shadow cabinet pic.twitter.com/AFi9Vf4StJ

— ghaleb cachalia. MP (@GhalebCachalia) November 3, 2023

Steenhuisen het gesê dat hy Cachalia altyd as ʼn gerespekteerde kollega en goeie vriend beskou.

“Dit is die verantwoordelikheid van ons almal, insluitend myself, om op te tree in die beste belange van die party in die aanloop tot die belangrikste verkiesing in ons geskiedenis,” het Steenhuisen gesê.