Datalek ‘ontbloot’ SA bitcoin-handelaar

Argieffoto (Foto: MichaelWuensch/Pixabay)

Die volledige transaksiegeskiedenis van die Suid-Afrikaanse bitcoin-handelaar, Mirror Trading International (MTI) is verlede week deur ʼn groep kuberkrakers, Anonymous ZA, gegryp en op die internet vrygestel.

Die name, gebruikersname, e-posadresse, bitcoin-saldo’s en verdienstes wat aan elke rekening gekoppel is deur die kuberkrakers gesien en ʼn afskrif van die data wat op 14 September van toepassing was, is op ‘n donker webwerf genaamd MTILeaks gepubliseer.

Die datalek volg ná daar die afgelope tyd uit verskeie oorde beweer is dat MTI eintlik ʼn piramideskema bedryf en beleggers wêreldwyd gemaan is om hul beleggings te onttrek.

In Suid-Afrika het die finansiëlesektor-waghond, die Gedragsowerheid vir die Finansiële Sektor (FSCA), onlangs gewaarsku dat MTI nie ‘n lisensie het vir die betrokke besigheid wat bedryf word nie. Die organisasie is ook baie bekommerd oor MTI se aktiwiteite.

“MTI beweer dat hy meer as R2,9 miljard van klante in handelsrekeninge het, maar ons kon nie finaal bevestig dat die fondse bestaan ​​nie. Boonop lyk die opbrengste op die beleggings wat MTI beloof, vergesog en onrealisties,” aldus die FSCA se verklaring.

Finansiële reguleerders in Texas en Kanada het ook onlangs alarm gemaak oor MTI se sakepraktyke en dit as ʼn piramideskema beskryf wat misleidende bewerings oor sy opbrengste gemaak het.

MTI gebruik ‘n baie aggressiewe multivlakbemarkingsveldtog wat 10% kommissie aan bestaande kliënte betaal wat nuwe beleggers werf.

Volgens MTI se webwerf is Johann Steynberg, van Polokwane die maatskappy se uitvoerende hoof en stigter. Die hoofkantoor is in Stellenbosch met satellietkantore in Randburg en die Strand.

Die datalek het glo gewys dat MTI Bitcoin-deposito’s van meer as R4 miljard ontvang het en dat sowat R2,9 miljard deur beleggers onttrek is. MTI benodig glo R3,1 miljard om die oorblywende deposito’s en verdienstes van al hul lede te dek maar die beskikbare balans is aansienlik minder.

MTI se bemarkingshoof, Cheri Ward, het die sekuriteitsbreuk vroeër in die media bevestig maar die akkuraatheid van die data wat vrygestel is betwis en volgehou dat die maatskappy nie ʼn piramideskema bedryf nie.

Sy het gesê die sogenaamde tekort in bitcoin wat Anonymous ZA beweer ʼn feit is, is gebaseer op die aanname dat MTI nie handel dryf nie en dis nie die geval nie. “MTI bly gefokus om ʼn diens aan lede te verskaf en ons beloftes na te kom, wat ons tot dusver buitengewoon goed gedoen het.”

Ward het Vrydag aan Maroela Media gesê die kuberaanval was kwaadwillig en onwettig en dat MTI ‘n bewese rekord van meer as 172 000 lede het wat almal tevrede is met die diens en ondersteuning wat hul van die maatskappy ontvang.

Sy sê MTI maak eksklusief gebruik van ʼn kunsmatige intelligensie-bot, ʼn sagteware toepassing wat geprogrammeer is om sekere take uit te voer. “Dit is ons eksklusiewe handelsgeheim en ons hele sakemodel is aan die eksklusiwiteit van die bot gekoppel. Ons doen dus wat ons kan om ons intellektuele eiendom te beskerm.”

Die skeptici bly egter ongelowig. Twee advokate wat tans verskeie piramideskemas ondersoek en beleggers wat geld verloor het bystaan sê dieselfde name kom in die topbestuur van die verskillende “word vinnig ryk-skemas” voor. “Al die skemas stort na ʼn ruk in duie en los dan ʼn klomp goedgelowiges in sak en as omdat hulle al hul pensioen of spaargeld verloor het.”

Die direktoraat vir prioriteitsmisdaadondersoeke (die Valke) ondersoek byvoorbeeld BTC Global waar 28 000 beleggers sowat R1 miljard verloor het. Die maatskappy het beleggers 14% groei per week beloof voor die stigter, Steven Twain, in 2018 verdwyn het.

“Daar word selfs beweer dat hy nooit bestaan het nie, dis ʼn teksboek ponziskema,” sê die advokate, wat verkies om anoniem te bly.

Hulle sê die staat van inperking was ook die perfekte verskoning om by so ʼn skema betrokke te raak want mense werk van die huis af terwyl ander weer soek na bronne om geld te verdien.

“Dis ook skrikwekkend hoe goedgelowig mense kan wees, hulle doen nie navorsing oor die onderneming nie, kyk nie of dit by die FSCA geregistreer is nie en stel nie vas wie dit bedryf nie, gewoonlik omdat gierigheid oorgeneem het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Jacobus

Ek het nog niemand teëgekom wat ‘n bloutjie geloop het met MTI nie. My ervaring van MTI is baie gunstig.

Stebastiaan

Wil net graag vir die mense sê wat die berig gepubliseer het dat hulle ‘n klokkie hoor lui het, maar nie weet waar die bel hang nie. Ek is lid van MTI.

Micheal

Cheri Ward was ook betrokke by btc global- ons het duisende verloor met die Steven Twain scheme – onttrek julle geld – soos ek se ek het baie verloor. In die begin het dit goed gegaan en so R5000 per week gemaak.

Duane

Dit raak nou totaal absurd en belaglik hóé desperaat die FSCA, Moneyweb en selfs nou Maroela Madia raak oor die MTI aangeleentheid! Julle is besig om totaal en al vals inligting oor MTI te versprei maar wat kan mens van julle verwag as Media in SA? Ek is deel van MTI, en nie die FSCA of enige iemand gaan vir mý sê om my geld te onttrek nie!! Al ooit gewonder hoekom die media so aangaan oor MTI? Omdat MTI ‘n groot gevaar is vir die finansiële sektor soos banke en instansies wat lenings aanbied teen belaglike rentekoerse!! Ek beveel… Lees meer »

Carl

Hoe sterk is die kriptostelsel as dit gebreek kan word? Is dit nou Bit Coin, of Bitter Coin?